سلمى صباحي لعمرو مصطفى: بشرة خير عجبتني وحديثك عن والدي جهل

أكدت الإعلامية سلمى صباحي، ابنة المرشح الرئاسي حمدين صباحي، أن أغنية الفنان حسين الجسمي لمصر "بشرة خير" أعجبتها لكلماتها الجيدة وليس لحنها، وذلك ردًا على محاولة الفنان عمرو مصطفى، ملحن الغنية، لاستفزازها بعدم حبه لوالدها، مضيفة أن حديثه عن صباحي ينم عن جهله.

وكتبت نجلة صباحي على موقع التواصل الاجتماعي "فيس بوك"، الجمعة: "مش عزيزي عمرو مصطفى.. معلش مقدرش أقول عزيزي لحد مش عزيز عليا فعلا! ليه بتجر شكلي! دانا لسه باشكر في الغنوة!!
أنا عارفة إن الغنوة لحنك وعارفة أنك مؤيد للسيسي وعارفة أنك مبتحبش حمدين وواثقة انك مابتحبوش " عن جهل" زي بالظبط مانت مش عارف بيشتغل ايه "عن جهل" وزي ما بتقول وبتردد كلام كتير جدا "عن جهل" برضو.. بس ده مالوش أي علاقة بأن الغنوة فعلا عجبتني

الفن بالنسبالي أنقى وأرقى من التوجهات والاختلافات والغنوة كلام قبل ما تكون لحن ومنكرش أن اللحن اللذيذ اللي شبه كل ألحانك المنحوتة عجبني برضو.. انت معروف عنك من أيام الجامعة اصلا انك "نحيت" شاطر بصراحة.. دي حاجة معروفة في الوسط كله مش أنا اللي اكتشفتها حتى اسأل أي حد!!

وأضافت نجلة المرشح الرئاسي: "بص أنا عارفة إن قلبك طيب جدا، لما شفتك صدفة في صدى البلد بعد ثورة يناير بكام شهر، وجيت سلمت عليا واعتذرتلي  عشان كنت كاتب عني على صفحتك، دي برضو اني منفعش مذيعة لأني "تخينة وفاشلة"، أد ايه ساعتها عرفت إنك سطحي لدرجه مرعبة، والمصيبة انك وقتها قلت كده بس عشان مبتحبش حمدين، مش عشان شوفتني فعلا لا أصلح كمذيعة.

وتابعت: في كل الأحوال انا شايفة أن الانتخابات مش مفروض تخسر الناس بعض -اكيد مبتكلمش عني انا وانت لأننا اصلا مش صحاب- لكن عموما متحاولش تخسر حد بكلام مالوش معنى، انا ليا اصدقاء بحترمهم جدا منهم ايمن بهجت قمر، وهو مؤيد للسيسي، لكن عمر ده ما خلانا نجرح في بعض ولا نهين بعض؛ لأن أنا مؤمنة إن كل واحد حر في اختياره طالما عارف هو بيختاره ليه..

وأكدت أن "كلمة تحيا مصر مش بتغيظني على فكرة!! ف كل الأحوال تحيا مصر طبعا بغض النظر عن مين الرئيس.. كده كده تحيا مصر بناسها مش برئيسها.

واستطردت: "بالنسبة بقى للبطء في الفهم انا مش هارد على الجملة دي، وبدعيلك ربنا يشيل الغشاوة من على عيونك وقلبك وضميرك عشان تعرف تشوف الحقيقة صح.. وفي الاخر ربنا يولي الأصلح عشان أهم حاجة مصلحة بلدنا".