6 إبريل إلى مظهر شاهين: مكانك محفوظ في مزبلة التاريخ

هاجمت حركة شباب 6 إبريل، الشيخ مظهر شاهين خطيب مسجد عمر مكرم بميدان التحرير، بعد أحدث فتوى له « تطليق الزوجة الإخوانية»، واعتبرت الحركة أن شاهين، كان يأخذ الثورة «سبوبة».

حيث جاءت رسالة حركة 6 إبريل إلى مظهر شاهين كالتالي:

المدعو مظهر شاهين…لو مراتك اخوانية طلقها.

على مستوى الدين:

أنت مثال جيد ممكن يتدرس عن علماء السلطان .. (بافتراض انك تملكه اصلا وعارف كويس اوى يعنى ايه تحرم ما احله الله وعارف كمان مسئولية وامانة العلم والفتوى انها تتقال فقط لوجه الله مش لوجه السلطان) عالم السلطان اللى ممكن يطلع اى فتوى باى شكل لمصلحة الحاكم..المهم ننول الرضا ونسيت انك المفروض بتحمل امانة العلم والكلمة وانك بتمثل دين ربنا حلل فيه الزواج حتى بغير المسلمة اصلا .. نسيت ان ربنا اقوى من السلطان اللى انت بتنافقه بفتوى فاسدة عشان مصلحة فى الدنيا وانه ابقى من كل ده.

ومن ناحية تانية باعتبار انك كنت امام مسجد عمر مكرم وقت الثورة وناس كتير كانت بتعتبرك خطيب الثورة … فانت برده مثال جيد للناس اللى كانت واخدة الثورة سبوبة كويسة عشان تظهر وتحقق مصالحها …. اللى زيك كتير يا مظهر .. ناس كنا بنحترمهم وكنا نتوسم فيهم خير انهم مع الثورة لوجه الله مش لوجه السلطان .. اللى ظهر انهم كانوا بيعارضوا بس عشان يظهروا ولما يظهروا معندهمش مشكلة انهم يبقوا من المقربين .. حتى لو على حساب القيم والمبادىء والحق وحتى على حساب الدين … عاوز فتوى .. ماشى .. نحرم اللى حلله ربنا .. يجوز ودا اجتهاد وطاعة اولى الامر واجبة يا جماعة.

اللى زيك وهما كتير للاسف مكانهم محفوظ فى مزبلة التاريخ والثورة..فاكرينكم زيكم زى كل اللى خان وباع.