حلم عمري ضاع.. أول تعليق للمطرب علي رؤوف بعد تعرضه لحادث مروع

كشف الفنان علي رؤوف، صاحب الأغنية الشهيرة أنا بشحت بالجيتار، عن تفاصيل حالته الصحية بعد تعرض لحادث مروري مساء أمس في محافظة السويس، بعدما اصطدمت سيارته بأحد الأرصفة بمنطقة الغريب.

وكتب علي رؤوف، عبر حسابه بموقع فيسبوك: أحب اطمنكم عليا وعلى صحتي أني بخير إلى حد ما، عندي بس شوية جروح وشرخ بسيط في منتصف القفص الصدري وكدمات شديدة في العمود الفقري، وبما أني صاحب الشأن بنفي أي خبر عن أني في حالة حرجة، أنا محتاج بس راحة من أسبوعين إلى 3 أسابيع، ومفيش داعي أني اتكلم عن الحادث أو تفاصيله.

وتابع: أينعم كتير عنده فكرة أن دي أول عربية اجيبها في حياتي وكانت حلم من أحلام عمري، بس مدام جت في الحديد فا في ستين مليون داهية، ومش محتاج أقول أن دي تحويشة سنين بس نقول إيه بقى غير اللي إيده في الماية مش زي اللي إيده في النار.

وواصل: الخلاصة أني بخير إلى حد ما ومش زعلان على حاجة ومسيري أقوم بالسلامة وأبدأ من الصفر تاني، كل اللي أنا طالبه على قدر حبكم ليا اتمنولي الخير، لأن أي نجاح أنا بعمله هو حصاد 15 سنة مرمطة وتعب بلا راحة وتكاسل، وأظن أي كارير في الدنيا محتاج تعب وكفاح، وأحب أن أحيط علم سيادتكم أني مش بتباها بممتلكاتي وخير دليل على ذالك محدش يعرف أني كان معايا عربية أصلًا ويوم ما انتشر الخبر كله شافها متدشملة في الحادث، لأني دايمًا براعي احتياج الغير للأشياء الثمينة فمبحبش أخلي أي حد يستفز بحاجة معايا هو نفسه فيها ودا من أصول تربيتي.

واختتم: وأخيرًا شكر خاص لرجال الأمن في محافظة السويس على إنقاذي أنا واللي كانو معايا، شكرًا لكل راجل محترم عنده نخوة ساعد في إنقاذ حياتنا من الحادث شكر خاص لأطباء المجمع الطبي في السويس على مجهوداتم العظيمة، شكر كبير جدًا لكل أصحابي وحبايبي اللي كلموني وسألوا عني وكانوا معايا لحظة بلحظة لحد ما رجعت البيت، وعلى راسي كل اللي تلهف عليا وسأل عني وعن صحتي.