” الترند كان وحش في رمضان وبقى جميل دلوقتي”.. مى عمر توجه رسالة لزميل سخر من التريندات

وجهت الفنانة مي عمر رسالة لزميل لها في الوسط الفنى دون الإفصاح عن اسمه او هويته، وذلك بعدما أنتقد في رمضان الفنانين والفنانات الذين يحتفلون بتصدر أعمالهم التريند، مشيرةً إلى أنه حاليًا يحتفل بتصدر مسلسله الذي يعرض في الأوف سيزون للتريند .

فكتبت مي عمر عبر حسابها بموقع التواصل الإجتماعي فيسبوك قائله: ( زميل، وكنت بعتبره صديق، طلع في رمضان كتب بوست بيتريق فيه على الناس اللي بتفرح وتشارك إنها ترند رقم واحد، والبوست كان كله بقى: “التريند مش هدف الشغلانة” و“‘إحنا بنشتغل عشان الفن مش الأرقام”… كلام تنظير وفزلكة على أعلى مستوى).

وأكملت مي عمر:( أنا ساعتها قلت مش هرد، وكنت سايبة الأيام تكشف، عشان كنت عارفة إن عنده مسلسل هيتذاع أوف سيزون، وأول ما يقرب من أي تريند حتى لو دخل رقم عشرة نص ساعة، هيبقى مش مصدق نفسه وهيقعد يشارك ويحتفل كأنه فتح القدس).

وأضافت الفنانة: ( وفعلا.. مكدبش خبر! أول ما مسلسله دخل التريند، بقى بيشارك فرحان إنه “رقم واحد”، الله! هو الترند كان وحش في رمضان وبقى جميل دلوقتي؟.طبعا أنا مش ضد إن أي حد يفرح بنجاحه، بالعكس مبروك والله، ومن حقك تفرح وتشارك لإن ده تعبك ومجهودك، بس ياريت نبطل المنظر بتاع: “أنا مختلف… أنا فوق التريندات” وبعد كده أول ما نقرب منها نطير من الفرح وننشر 20 ستوري)

واختتمت مي البوست : (أنا عارفة إن أي حد يعرفني كويس هيستغرب من كلامي، لأني عمري ما رديت على حد، بس بجد ليه إحنا شطار جدًا في إننا نحرّم على غيرنا حاجة، ولما تيجي في ملعبنا تبقى فجأة أحلى حاجة في الدنيا؟ في الآخر، الترند مش هدف، غير لما يبقى معانا، للتوضيح، كلامي مش موجّه لأي نجوم شاركوا في العمل بالعكس أنا بقدّرهم وبحترمهم علشان ماحدش يفهمني غلط).

المعروف أن أخر أعمال مي عمر مسلسل إش إش الذى شاركت من خلاله موسم رمضان الماضي 2025، وضم العمل كل من الفنان ماجد المصري، انتصار، دينا، ادوارد ،هالة صدقي، محمد الشرنوبي، عصام السقا، شيماء سيف، علاء مرسي وإيهاب فهمي ، ومن إخراج محمد سامي.