تامر فرج يعلق على أزمة التيك توكرز بهذا الشكل

علق الفنان تامر فرج على أزمة اليتك توكرز المثارة حاليا على الساحة المصرية.

وكتب تامر فرج عبر حسابه بموقع فيسبوك :"خلاص اختلفنا واتناقشنا واتهمنا الناس فى تريند التيكتوكرز وتجارة الأعضاء؟؟ طب ممكن نهدى خمس دقايق بقى نتهم فيهم نفسنا؟ أيوة.. نتهم نفسنا.. هو مين اللى عمل لايكات وزود الريتش وعمل فولورز وقيمة للناس دول؟؟ مش احنا؟؟".

وأضاف :"مين اللى عملهم سعر بمتابعتهم ولو حتى من باب التريقة عليهم فالفلوس جاتلهم بالتبعية؟ مش احنا؟؟ مين اللى قلب الموازين وخلى أن أي نكرة يبقى ليه وزن وتتفتح له أبواب الشهرة والمال والتمثيل وخلاه يدوس على قيم أو موهوبين ويحسس الناس أن الشغل أو الدراسه مالهمش لازمة والفلوس اهيه بتيجى بالهيافة والساهل ؟؟؟ مش الزرار اللي تحت صباع حضرتك وبتدوس عليه باستهتار وسهولة وبتستتقل قوى تدوسه على محتوى هادف أو لتشجيع موهوب؟؟".

واستكمل:" مين اللى شيرلهم محتواهم سواء للاعجاب أو للتريقه أو للنقد والرفض؟؟ مش أنا وحضرتك والأخت اللى قاعده هناك؟؟ زى ما اتهمناهم ورفضنا سلوكهم أرجوكم نتهم انفسنا ونتحمل مسئوليتنا ونصلح الوضع القمئ ده أرجوكم احذروا خطر الازرار تحت ايديكم التى تعبثون بها دون تفكير وإذا اتفقنا ان هؤلاء على باطل فأميتوا الباطل بالسكوت عنه ولا تشجعوه بالخوض فيه ولو للهزار والتريق"