أول تعليق من محمد هنيدي على أزمة التيك توكرز

علق محمد هنيدي على أزمة التيك توكرز المثارة حاليا ، والقبض على عدد منهم، كاشفًا من وجهة نظره سبب تصدرهم المشهد.

وكتب محمد هنيدي تعليقًا على فيديو للإعلامي محمود سعد يتحدث فيه عن نفس الأزمة: "المشكلة مش الذوق العام ولا فكرة تدخل الدولة. المشكلة أعمق بكتير… وهي إن نوع معين من المحتوى "الشعبوي"، اللي فيه حوار شعبي، شوية شتيمة، شوية إيحاءات جنسية، بقى بيعجب شرائح كبيرة جدًا من الناس. بصراحة، حتى إحنا ممكن نوقف ونتفرج. كفضول".

وأضاف محمد هنيدي: الناس دي بقت مصدر جذب اكتر من السينما والتلفزيون. ومع كل لايك ومشاهدة، بيطلع ناس تانية تسيب شغلها وتقول: "أنا كمان هعمل ده". في الأول بيبدأ لايف بسيط، ومع الوقت – ومع قلة الفلوس – الناس دي تبدأ تزوّد في الانحدار علشان تجيب مشاهدات. والكارثة؟ الجمهور موجود.

واستكمل، "تيك توك بقت المنصة الأولى في الشرق الأوسط ومصر. لو نزلت مول البستان أو مول أركان، هتلاقي ٧٠٪ من الناس عارفين التيكتوكرز واحد واحد. بقى عندنا نجوم بيعملوا إعلانات، وبيتكرموا، وبيتصوروا في كل مهرجان".

وأنهى حديثه قائلا:" النتيجة؟العقل الجمعي للمجتمع بيتغيّر. الجيل الجديد بقى شايف إن ده هو "الصح"، وده هو النجاح. وناس كتير، رغم إنها مش قادرة تعمل زيه، لكن بتحس بإحباط… واحد بيشقى ١٢ ساعة، والتاني بيشتم أهله وبيقول لفظ خارج ويكسب أكتر منه بـ ١٠ مرات. أنا مش مع المنع، بس صعب ننفي إن في خلل كبير. خلل بيمسّ العقول، والوعي، وشكل المجتمع نفسه. التأثير حقيقي… وخطر جدًا على أجيال كاملة".