شوبير يهاجم بيسيرو بعد خروج الزمالك من كأس عاصمة مصر

هاجم الإعلامي أحمد شوبير، البرتغالي جوزيه بيسيرو، المدير الفني للفريق الأول لكرة القدم بنادي الزمالك، بسبب تصريحاته عقب الخروج من بطولة كأس عاصمة مصر.

وقال شوبير في تصريحات إذاعية:" أنا إمبارح معجبتنيش تصريحات بيسيرو مش مبسوط منه، الراجل ده أنا شايفه مدرب كويس واستضفته قبل كده وكان كلامه جميل وعاقل، وقال لي كان نفسه يدرب في مصر، بس قصة إنه يقول ضغطونا ومش عارف إيه ده مش مبرر جيد، خاصة إنه لعب إمبارح بعدد كبير من اللاعبين الأساسيين، ولما عمل تغييرات لعب 4 ثقال جدا دفع بـ عبدالله السعيد ودونجا وأحمد فتوح ومصطفى شلبي، والزمالك كان محتاج يكسب 2-0 بس ويتأهل".

وتابع حارس مرمي الأهلي ومنتخب مصر الأسبق:" طبعا كأس العاصمة هى البطولة رقم 3 في مصر، لكن كان سهل يا مستر بيسيرو إنك تكمل وتفوز بيها، وبعدين كل شوية تغيير طريقة اللعب، ده مينفعش في الوقت ده، كمان الزمالك لم يخلق الفرص وأنت خارج من الكونفيدرالية من كام يوم والجماهير كانت غاضبة".

وأتم شوبير تصريحاته قائلا:" لكن في النهاية كان هيبقى اسمك خدت بطولة، وبعدين فين الروح مش حلو بصراحة، وتغييراته متأخرة بشكل عام مكانش ده الأفضل منه إمبارح، وبعدين بيقول لك أنا سعيد اللاعيبة بتحارب، ده مينفعش أنت بتتكلم عن نادي الزمالك".