«الأهلي بيجيب فلوسه منين؟».. شوبير يسخر ويرد: خليك شاطر واعمل زيه

رد الإعلامي أحمد شوبير على ما يتردد من بعض منافسي الأهلي حول مصدر أموال النادي التي يبرم بها الصفقات الكثيرة في الفترة الحالية، وسر نجاحات المارد الأحمر المستمرة.

وقال أحمد شوبير في تصريحات إذاعية اليوم: «إمبارح رئيس نادي مونبلييه الفرنسي قال لم نتلق أي عرض من النادي الأهلي لضم الجناح الأردني موسى التعمري، فإحنا نقوم نسيب رئيس النادي بقه ونفضل نقول آه الأهلي عرض 6 مليون و10 مليون و50 مليون وكنز الأهلي، آه فعلا الأهلي وقع على كنز ومش من النهارده ده من زمان».

وأوضح أحمد شوبير: «كنز الأهلي اسمه الاستقرار ناس عندها أولويات وعندها شغل بتقوم بيه ولما يكون فيه أخطاء بتشتغل عليها وبتعالجها، كنزه إن بيحصل على البطولات الأفريقية فبيزود رعاياته ويخلي ييجي له عروض رعاية كثيرة هو ده الكنز يا جماعة».

وأضاف شوبير ساخرا من مرددي مثل هذا الكلام: «إحنا عندنا للأسف ثقافة الشماعة، لما أغلط لازم أشوف شماعة، فتيجي يقول لك أصل الأهلي عنده فلوس أصله بياخد بطولات، طيب يعمل إيه بلاش يفوز وياخد بطولات، خليك شاطر واعمل زيه».

واختتم شوبير: «أنا مثلا من الناس التي لا تهاجم بيراميدز ومعجب بما يقوم به، فقد بات منافسا قويا وبيكسب الزمالك والأهلي آه عندهم أخطاء لكن فيه حاجة صح بتحصل ناس اشتغلت بشكل كويس وعندهم إمكانيات».