دنيا المصري: شخصية سميحة أضافتلي.. وانهارت نفسيًا بسبب حق عرب

تحدثت الفنانة دنيا المصري، عن مشاركتها في مسلسل حق عرب، الذي عرض في السباق الرمضاني الماضي 2024، وحقق من خلالها نجاحًا كبيرًا.

وأوضحت دنيا المصري، في حوارها مع الإعلامية يارا أحمد، في برنامج نجمك مع يارا، المذاع عبر شاشة قناة “هي”: سميحة قلبتلي الدنيا ومكنتش متوقعة خالص أني هعمل الصدى ده، أنا تعبت في الشخصية دي جدًا جدًا وطلعت بالشكل ده للناس والناس صدقوها، الناس بتحسب أني سميحة بجد، والشخصية حققتلي نجاح كبير.

وتابعت: أنا زعلت أوي لما خلصت تصوير الشخصية وآخر يوم تصوير تعبت جدًا، اتعلقت نفسيًا بالشخصية وأول ما قالوا فركش تعبت، ولكن الحمد لله بعرف أفصل بين شخصيتي الحقيقية والشخصية اللي بجسدها، الشخصية مبتأثرش على ولادي ولكن بتأثر عليا نفسيًا خاصة لما تكون شخصية أنا بحبها.

واستطردت: سميحة أضافتلي كتير أوي وحسستني أني أخدت خطوة ثابتة في حياتي، وأن اللي بيتعب ويجتهد تعبه مبيروحش أبدًا، في ليالي كتير أوي من كتر الضغط النفسي كنت بنهار وبعيط وأن إزاي هعمل المشاهد الصعبة دي، وكل ده ربنا بيحوشه ووراني النجاح ونسيت كل التعب.

يذكر أن برنامج نجمك مع يارا يعرض يوم أربعاء من كل أسبوع في تمام الساعة 10 صباحًا، وإعادة يوم الخميس في الساعة 1 بعد منتصف الليل، والبرنامج من إعداد مروة محمد ورانيا عبد اللطيف، على شاشة قناة هي.