نور التوت باكيا: أنا وحمو بيكا بناكل وبنشرب ونام مع بعض وبياخد بالدولار ويقبضني بالمصري

قال مطرب المهرجانات نور التوت، أن شركة مزيكا أوضحت أن حمو بيكا هو الذي يتسلم أرباح قناة اليوتيوب، وأن علي قدورة أعتزل الغناء وقال :"فلوس الأغاني متحرمه عليا".

وتابع نور التوت، خلال مداخلة تلفزيونية مع الإعلامية نهال طايل في برنامج "تفاصيل"، المذاع على قناة "صدى البلد 2"، :"حمو بيكا قال أني أخدت منه فلوس وعملي محضر.. إيه اللي يثبت على كلامه، حمو كان ماسك كل حاجه وكنا بنسافر مع بعض حفلات في تونس ومكنتش بعرف الأجر اللي بياخده وكان بياخد القبض بالدولار ويقبضنا بالمصري.. أنا عمري ما شوفت الدولار".

وأشار نور، إلى أنه أتصل على حمو بيكا هاتفياً، وقال له :"أنت بتعملي محضر علشان بتكلم عن حقي، أنا لو في حساب معاك هحاسبك بالقانون.. 11 سنة واكلين وشاربين ونايمين مع بعض".

وأوضح "التوت"، أن حمو بيكا دائماً يعتبره بمثابة ابنه، وأنه تعرض لدمار كبير في حياته الشخصية، وهناك أشخاص كثيرون مقربون منهم تدخلوا لحل تلك الأزمة، وحمو بيكا يملك أموال كثيرة ولكنه يرفض رد أرباحه من قناة اليوتيوب.

وأختتم نور التوت، حديثه قائلا:"معرفش موضوع عربية بيكا إذا كان تريند ولا لأ.. ولكن أنا بتمنى لحمو أن ربنا يكرمه وأشوفه أحسن الناس وعمري ما هتمنى أشوفه في حاجه وحشة وبدل ما يجيب عربية بورش يجيب طيارة".