عمر كمال: حبيت واحدة وسيبتها علشان مقدرتش ظروفي

حل المطرب عمر كمال ضيفًا على برنامج "خلاصة الكلام"، وأكد خلاله حواره مع الإعلامية أميرة بدر ما انتشر في أحد مقاطع الفيديو حول عمله في بنزينة، موضحًا أنه عمل في مهن مختلفة منذ عمر 13 عام وكافح كثيرًا حتى وصل لما هو عليه الآن.

وقال: "اشتغلت وأنا عندي 13 سنة بتاع شرايط دينية قرآن وأدعية، وكنت بنزل العتبة اشتري جملة وأركب القطر من السويس لغاية محطة عين شمس وأروح العتبة، وأبويا كان شيخ وعايز يحطني في شغلانة كويسة، وكنت ببيع الشريط بـ 2 جنيه، وكنت ناصح جدًا وشاطر، وبكسب من 100 لـ 200 جنيه في اليوم".

وأضاف: "بعد كده أبويا مات، وروحت اشتغلت بتاع براويز، واشتغلت في محل جزم وكنت بحب الشغلانة جدًا، وكنت حافظ مخزن الجزم كله، مكنش شغل مهين والمهين أني مكونش عارف أصرف على نفسي، ولكن لما تكون عروسة جاية ومعاها خطيبها وأنزل أقيسها تحت رجل الست، كان شعور صعب، وفكرت أني مينفعش في يوم من الأيام أحب واحدة من اللي بتيجي المحل".

وروى تفاصيل خطبته لفتاة ثم إنهاءه العلاقة بسبب عدم تقديرها له، قائلًا: "أنا حبيت بنت جدًا وروحت علشان أخطبها، ووقتها كنت شغال بـ 200 و 300 جنيه آخر الأسبوع، وأم البنت كانت بتقولي هات أي حاجة واخطبها عشان محدش يتكلم، وأنا معايا 2000 جنيه وجايبهم بعد شقى".

وتابع: "روحت عندنا في السويس عند واحد بتاع ذهب وخدت صاحبي معايا، وأنا مكنتش أعرف قراءة الفاتحة بيجيبوا فيها إيه، والبنت خدت دبلة وخاتم ومحبس، والراجل قالي حوالي 7000 وأنا معايا 2000 بس، فبقوله مفيش حاجة أرخص، قال للبنت خدي الدبلة بس قالتله ليه هو من أولها، ده أنا مش جايبة حاجة تقيلة، فلما خرجت لاقيت المعاملة اتغيرت ووصلتها وكلمت أهلها ولغيت الموضوع".