غادة عبد الرازق: في بداية مشواري الفني أهلي قالولي هتفضحينا وهتبقى كومبارس

خلال لقاء برنامج "كلمة أخيرة" الذي تقدمه الإعلامية لميس الحديدي على شاشة "ON" كشفت النجمة غادة عبد الرازق عن أن شخصية "عايدة" فى مسلسل "صيد العقارب" تشببها كثيراً في محاولتها طيلة حياتها أن تثبت أن البنت باستطاعتها تحقيق العديد، وليس شرطاً أن يكون الولد أفضل منها، قائلة: "طول الوقت كنت بحاول أثبت لأهلي إني قوية، كان عندى أخ صغير توفى اسمه خليل وهو ولد واحد وكان مميزا جدا عننا علشان هو الولد وكان سبب في موت أبويا".

واضافت خلال اللقاء قائلة: "أبويا كان بيترافع في قضية الوفد بمجلس الدولة، وقبلها بيومين أخويا خليل عمل حادثة وخبط حد بالعربية والولد اللي اتخبط كان فى المستشفى، وخليل مكنش عايز يقول لأبويا الولد فين، فاللي أنا افتكرته كانت فيه خناقة وبابا كان داخل على خليل أوضته يضربه وبيقول له قوللي الولد فين، وبعدين الحمد لله طلع إن الولد مكنش مات، بس بابا خلال جلسة الوفد جاله هبوط في الدورة الدموية ووقع بالمحكمة وجاله جلطة ومات، وأنا وقتها كان عندى 12 سنة ومن وقتها كنت باثبت إنى أقدر أقيم هذه الأسرة".

وتابعت غادة عبد الرازق: "خليل أخويا اتوفى وأنا عندى 15 سنة، وبابا توفى وأنا عندي 12 سنة، وبالتالى فضلت أنا وماما ويسرية، وبدأت اشتغل وعمرى 21 سنة من بوابة الإعلانات، ومكنش التمثيل في الخطة".

واستكملت الفنانه غادة: "أهلي في الأول رفضوا دخولي التمثيل، وماما وقعت وتعبت بس أنا كنت عندية، وفي بداية مشواري قالولي هتفضحينا وهتبقى كومبارس، قلت لهم في يوم من الأيام هبقى نجمة كبيرة وهوريكم".