محمود سعد بعيد ميلاده الـ70.. أمي عملت المستحيل عشان تسقطني.. وكل العيلة كانت بتعاملني كويس إلا أبويا

كشف الإعلامي محمود سعد، أسرارًا جديدة من حياته الشخصية، في عيد ميلاده الـ 70، الذي احتفل به بالأمس، حيث أشار إلى أن والدته حاولت في البداية إجهاضه، ولكن هذه المحاولة باءت بالفشل، كما أكد أن كل أسرته كانوا يعاملونه بأفضل شكل باستثناء والده.

وقال محمود سعد في فيديو له، عبر قناته الرسمية بـ يوتيوب: أمي عملت المستحيل عشان تسقطني، ودايمًا كانت تقول الواد ده نازل ضعيف عشان كدة دايمًا تعبان، كان ليا أخين قبلي ثم بنت، وأبويا كان عايز يشوف نفسه، أمي قالت له أنا حامل، ووقتها مكنش في مستشفى تروح تتخلص من الجنين، وناس قالولها نطي من على السرير، عشان تتخلص مني، لكن أبدًا تتخلص من مين أنا فضلت ماسك في الدنيا.

وأضاف محمود سعد: الحقيقة كان غير مرغوب فيا، كل العيلة كانوا كويسين جدًا معايا وبيدلعوني باستثناء أبويا، في يوم ميلادي كانت جدتي أول واحدة تتصل بيا، أهم مكالمة تحصل في عيد ميلادي، كانت بتكلمني الصبح بدري قبل ما أروح المدرسة ربنا يرحمها.

وفي سياق متصل بدأ محمود سعد عامه الجديد مستعينًا بكلمات أغنية عدت يا يوم مولدي، التي غناها فريد الأطرش.