بعد نجاح أغنية ياقمر للهضبة..مصطفى حدوتة : أثبتت نجاحي في كل ألوان الغناء(حوار)

مصطفى حدوتة شاعر ومؤلف أغان استطاع أن يثبت لنفسه مكانة خاصة في الوسط الفني تضاهي كبار المؤلفين، وتعاون مع أشهر النجوم كان آخرهم النجمة أنغام والهضبة عمرو دياب، وكان للنهار هذا اللقاء معه:

-ما هي كواليس التعاون مع الهضبة عمرو دياب ؟

كان التعاون مع النجم عمرو دياب عن طريق الملحن محمد يحيي ، وهناك مشاريع بيني وبين الهضبة عمرو دياب في الوقت الحالي ، ولكن مقدرش حاليا أصرح بيهم إلا عند تحديد موعد نزول الأغنية ، وأول أغنية بيني وبين الهضبة كانت ( يا قمر ) من ألبوم مكانك.

-هل سعيد بتعاونك مع الفنانة أنغام ؟

طبعا ، مبسوط جدا بالتعاون معاها ، ومبسوط أن عملت حاجة لبلدي من خلال أغنيتي مع الفنانة الكبيرة أنغام ( حلفونا ) .

-هل سنري قريبا عمل لدعم القضية الفلسطينية من كلماتك ؟

ليس هناك أي مشاريع حاليا ، لكني أفضل المشاركة بفعل مش أغنية ، لكن لو جالي فنان عاوز يعمل حاجة زي كده هعمله طبعا .

-من هو المطرب الذي تتمني العمل معه الفترة القادمة؟

أي مطرب لديه موهبة أتمني اشتغل معاه ، حتي لو مش مشهور أوي ، أنا أتشرف بالعمل مع أي فنان .

- كشاعر ومؤلف ما هي الأغنية المفضلة بالنسبة لك ؟

أغنية بعيد عنك حياتي عذاب لكوكب الشرق.

-تقول إيه للناس اللي شيفاك بس شاعر مهرجانات ؟

برد عليهم طبعا بالشغل ، بحاول أغير الفكرة دي بأن أشتغل حاجات تانية غير المهرجانات ، الأنطباع الأول يدوم .

-هل شاعر الأغاني يستطيع كتابة قصة فيلم ؟

أه طبعا ، وأكبر مثال الشاعر أيمن بهجت قمر ، والأستاذ مدحت العدل .

-ماهو الوقت الذي تأتيك الأفكار لكلمات الأغاني ؟

طول الوقت لأن دماغي طول الوقت مشغولا بالشغل ، مفيش طقوس معينة أو أوقات معينة .

-من هو الملحن الذي تفضل الشغل معاه ؟

كل الملحنين بحب أشتغل معاهم ، زي وليد العطار أخويا وصديقي ، الملحن محمد يحيي ، والملحن محمد شحاتة ، وناس كتير ممكن أكون ناسي حاليا ناس كتير منهم .

-هل هناك مطرب معين أشتغلت معاه وتعبك في تعديل الكلمات ؟

أكيد طبعا ، لازم المطرب يكون مقتنع باللي بيغنيه ، في الأخر أحنا فريق عمل واحد ، لازم يكون فيه تعاون بينا علشان نوصل لأحسن شغل في النهاية ، علي سبيل المثال المطرب أحمد سعد مكنش عاوز جملة ( سيبوه أنا عايزو حي ) وأقنعته بها،وبالفعل عملت صدي كبير مع الناس وبقت تريند .

-هل أغنية بنت الجيران كانت وش السعد عليك ؟

كل الأغاني اللي عملتها كانت كل واحدةً منهم وش السعد عليا ، لولا الأغاني اللي عملتها قبل أغنية بنت الجيران ونجحت فيها مكنتش عملت أغنية بنت الجيران .

-ما هي أول أغنية قدمتها للجمهور؟

أغنية ( حب تاني لأ) من غناء المطرب قرشي ، وبسببها اتعرفت علي مطرب تاني أسمه أحمد موسي وعملنا وقتها أغنية ( ضربة بضربة ) وحققت الأغنية نجاحا كبيرا ووصلت لحوالي 40 مليون مشاهدة ، وبعدها عملت أغنية ( يا جميلتي ) والتي حققت 150 مليون مشاهدة ، غناء المطرب أمير خطاب.

-كيف تعرفت علي المطرب حسن شاكوش ؟

حسن شاكوش كلمني بعد نجاح أغنية ( يا جميلتي ) .

-ما هو أول تعاون بينك وبين المطرب حسن شاكوش ؟

كان عن طريق أغنية ( بنت الجيران ) ، وغناها هو والمطرب عمر كمال ، وكان أول تعاون بيننا ، وحققت نسبة مشاهدة 700 مليون مشاهدة ، وبعدها عملنا أغنية ( عود البطل ) .

-هل من وجهه نظرك كل الأغاني اللي عملتها كانت ناجحة ؟

حتي لو محققتش النجاح الكبير هي علًمت مع ناس كتير وكانت مفضلة بالنسبة لعدد كبير من الناس .

-من هو المطرب اللي ليك الفضل أن الناس تعرفه ؟

مفيش حد أقدر أقول عليه كدا ، ولكن فيه ناس لما أنا بعدت ومبقناش شغالين مع بعض شايف أنهم مش قادرين يعملوا أغاني كويسة نقدر نقول أنها حققت نجاح كبير ، وتقريبا ده بينطبق علي كل الفنانين الجدد اللي اشتغلت معاهم .

-هل تري بأنك السبب في شهرة عمر كمال ؟

لما أشتغلت مع عمر كمال كل الناس عرفته ، لأنه قبلها بحوالي 15 سنة هو بيغني ومحدش كان يعرفه ، وعمر كمال حكي الكلام ده في أكثر من حوار ، إحنا الناس عرفتنا سوا من خلال أول أغنية عملناها.

-هل بصمتك في المهرجانات أقوي ولا الأغاني الرومانسية ؟

أنا شايف نفسي دائمآ أقوي في كل عمل بقدمه ، من بدايتي حتي الأن ، الحمدلله ربنا بيوفقني في كل أغنية بعملها .

-لو هتصنف نفسك كشاعر ومؤلف أغاني ، هتصنف نفسك ناجح أكثر في المهرجانات ولا الأغاني الرومانسية ؟

الحمدلله في كل ألوان الغني أنا نجحت وأقدر أشتغل أي حاجة ، أنا قررت أن مش هشتغل مهرجانات تاني ونجحت مع فنانين كبار منهم عمرو دياب .

-لماذا أختفيت إعلاميا خلال الفترة الماضية ؟

أنا مبحبش الظهور الكتير ، حتي صحابي مش بيشوفوني ، وأخر مرة أتصورت فيها من حوالي أربع سنين.

-هل لو عرض عليك الظهور في أحد البرامج التليفزيونية هتطلع ؟

طبعا لو حاجة مناسبة هوافق أكيد .

-ماهو العمل الذي ندمت عليه ؟

الحمدلله عمري ما ندمت علي شغل قدمته .

هل هناك شخص معين ندمت علي الشغل معاه أو علي معرفته ؟

لا عمري ما ندمت علي شخص خذلني ، بمشي من غير ما أعاتب أشخاص.

-أثناء كتابة أغنية مخاصماك هل كنت عارف أن المطربة نوال هي الي هتغنيها؟

أنا بكتب الأغنية وبسيب الملحن هو اللي بيلعب في الأغنية وعلي حسب ده بنشوف مين اللي يقدر يغني اللون ده .

-مين هو صاحب فكرة أن نوال هي اللي تغني أغنية مخصماك ؟

الفنانة نوال أختي وصديقة عزيزة عليا ، سمعت صوتها عجبني جدا ولقيت أن عندي أغنية هي هتقدر تغنيها ، وبالفعل الأغنية نجحت جدا ، وحاليا فيه شغل في فيلم ( عادل مش عادل ) وهي تجسد دور فيه ، بطولة الفنان أحمد الفيشاوي ، وإن شاء الله هينزل في الفيلم أغنيتين ، هتغنيهم نوال .

-من هو قدوتك من الشعراء ؟

أحمد بدراوي طبعا قدوتي .

-ما هي رسالتك اللي تحب توجيهها للشباب ؟

الاجتهاد علشان ربنا مش بيضيع تعب حد أبدا ، وليس للإنسان إلا ما سعي ، علي حسب ما هتكون أنت شايف نفسك فين أسعي ربنا هيكرمك مفيش حاجة صعبة .