هادي الباجوري يكشف حقيقة وجود جزء ثاني من مسلسل سفاح الجيزة

كشف المخرج هادي الباجوري، عن إمكانية إنتاج جزء ثاني من مسلسل سفاح الجيزة، بطولة الفنان أحمد فهمي، والذي عُرض خلال الفترة الماضية عبر منصة شاهد الإلكترونية.

وقال الباجورى فى تصريحات له فى احدى البرامج التليفزيونية: إحنا لسه مش محددين في جزء ثاني أو ثالث ودي حاجة ليها علاقة بشركة الإنتاج أكتر مني، لأن ممكن يكون في جزء ثاني ومكنش أنا المخرج بتاعه مش لازم كل الأجزاء أكون أنا المخرج بتاعها، ولكن شركة الإنتاج هي اللي بتحدد، واللي أنا عارفه أن في خطة يكون في جزء ثاني.

وتابع: أنا دايمًا لما بحب أعمل حاجة يكون عندي تحدي بعمله، والجزء اللي الناس شافته أنا كمخرج معملتش النوعية جي قبل كده، والجزء الثاني لو اتعرض عليا لو ملقتش فيه الحاجة اللي تخليني أعمل حاجة جديدة ممكن أعتذر.

واستطرد: أنا مبتأثرش أوي بآراء السوشيال ميديا سواء كانت بالمدح أو لأ ومش بتابعها أوي، وأنا بقيم العمل من وجهة نظري أنا مبسوط منه ولا لأ أو فيه عيوب وببقى عارف من الأول أن ده اللي أنا راضي بيه، ومفيش عمل مفيش فيه آراء مختلفة ومقدرش أسأل الناس إنتوا كنتوا عايزينه ينتهي إزاي، ودي حاجة موجودة طول الوقت وفكرة أن يكون في آراء مختلفة دي حاجة صحية للعمل، ومستحيل نرضي كل الناس.

وأردف: ممكن الجزء الأول من الحلقات علشان كان في قتل ودبح ودم، الناس شافوه مختلف عن الجزء الثاني من الحلقات وده اللي إحنا قصدناه ومحدش كان متوقع اللي حصل في الحلقات.