بلبس فورمال ..”كريم” مهندس الصبح وبتاع تين شوكي بالليل

رغم أنه مهندس كهرباء صباحاً فى أحد الشركات، لكنه قرر أن يبني حياته ويفتح باب رزق لنفسه.

المهندس كريم المنياوي، 30عامآ، شاب سكندرى قرر أن يقف بعربة التين الشوكي فى أحد الشوارع بمنطقة العجمى، بدون خجل أو خوف من المجتمع، فهو شاب طموح يريد أن يلقن الشباب رسالة مفادها "الشغل مش عيب"، وأن الخطأ هو أن يعتمد الشخص على الغير، بدون خلق باب رزق بالحلال لنفسه.

قال «المهندس كريم» خلال بث مباشر لـ "النهار": أنا أعمل مهندس كهرباء في أحد الشركات بالإسكندرية، وباحث ماجستير في التخطيط والتنميه بمعهد التخطيط القومي، ودرست بالأكاديمية البحرية بعض الدورات في مجال السلامة وأيضاً تحصلت على دبلومة فى إداره الأعمال فى الجامعة الأمريكية، وأمارس لعبة الكاراتيه وحصلت على بطل أفريقيا سنه 2014، ومع ذلك دائمًا أسعى لفتح باب رزق لنفسي دون الإعتماد على الغير، فكرت فى حاجات كتير ولكن توصلت لأكتر حاجة محبوبة وتجذب المارة، أنى أقف وأشتغل على ترابيزة تين شوكي في محيط منطقتي، وبالفعل بدأت من أسبوع على الترابيزة، و الناس بقت تجيلى كتير، وبدى الأطفال التين الشوكى ببلاش؛ لأنى بفرح لما ألقيهم فرحانين.

وتابع «كريم»: "أي شغل أشتغلته كنت دائمًا بحس بكرم ربنا عليا، وعمري ما بصيت للشغل أنه عيب، وأنى مهندس وإزاي أشتغل في هذه المجالات دي، لكن دائمًا كنت بسعى للكسب الحلال، وإني أكون مثال لبعض الشباب اللي خايفه تنزل تشتغل عشان نظره المجتمع، ولازم أي شاب يكون عنده مصدر دخل إضافي بجانب الوظيفة ويكون شغل خاص للشخص نفسه، ممكن تنجح فيه وممكن تفشل، ولكن النجاح الحقيقي أنك لما تفشل تقوم من تاني وتبدأ، ووقتها هتنجح وهتفتخر بنفسك، ووالدى و والدتى بيدعمونى فى كل شى وزوجتى دائمًا في ضهري وبتساعدنى أنى اكون ناجح".

وأضاف "المنياوى": أنا بشتغل الصبح مهندس كهرباء ف الشركة من الساعة 8 صباحاً إلى الساعه 5 مساءاً ثم على ترابيزة التين الشوكي من الساعه 7 مساءاً إلى الساعه 12 منتصف الليل.

وينهي حديثه قائلًا: "أنا بشتغل حبًا ف الشغل، وعشان أي شخص طبيعي واجب عليه يشتغل ويفتح باب رزق لنفسه، و يطور من ذاته و ينجح دائماً فى كل خطوات حياته، و يقتل اليأس و الإحباط و الفشل ويفكر أنه يستمر فى النجاح وبس.