حسام داغر عن وفاة قطته بـ”سم فئران”: في ناس قلوبها منزوع منها الرحمة

أعلن الفنان حسام داغر، عن وفاة قطته بعدما قام برعايتها عقب تعرضها للتعذيب من قبل مجموعة من الأشخاص قاموا بربطها بحبل لكي يلعبون بها، موضحا أن سبب الوفاة هو قيام شخص بوضع مادة سامة في الطعام.

ونشر حسام داغر، مجموعة من الصور عبر حسابه الشخصي بموقع تبادل الصور والفيديوهات الشهير بـ "إنستجرام"، لقطته وهو يعالجها عند مستشفى خاصة بالطب البطري وذلك قبل وفاتها.

وكتب حسام داغر: "القط الصغير البرتقالي مات .. كان جميل و طيب و بيحب يلعب مع الناس اختي لقته عند السوبرماركت و الاطفال رابطينه بحبل و بيلعبو بيه .. زعقتلهم اختي و قالتلي خليه عندك في الجنينة .. ربيته عندي و مكانش ليه اسم .. كل حد ييجي يسميه اسم الي مسميه مشمش و الي مسميه حزلقوم و الي مسميه سيمبا".

وتابع حسام داغر، :"الكل اتفق على حبه لانه كان بيحب الناس قوي و بيحب يقعد على حجرهم و يبقي مبسوط .. كان عندي قطه مخلفه جابت قطة واحدة وحيده كانت قاعده لوحدها عندي في الجنينه بقي هو اخوها و صاحبها و حبيبها بيلعبوا سوا طول النهار و ياكلوا سوا و يطلعوا علي سلك الوميتال سوا ".

وأضاف حسام داغر: "من اول امبارح و هو مش مضبوط وديته للدكتور العياده قالي حد حط له سم فيران .. هو بيحب الناس ممكن حد ندهله بره و حطله الاكل و هو كل بحسن نية، حاولت كتير نلحقه بالأدوية من امبارح التنفس عنده في مشكله و مكنش بياخد نفسه و النهارده قاعد يشم هوا بصعوبة ونام على جنبه و بصلنا و مات.. عمره خلص".

وأختتم حسام :"القطه التانيه خايفه عليه اضطريت ادخلها جوا علشان متشوفش و احنا بندفنه قلبي واجعني كان متمسك بالحياة و بيحب البشر ميعرفش ان فيهم ناس قلوبها منزوع منها الرحمة مات وعينيه مليانه دموع من الألم.. مكانش ليه اسم بس كان طيب و جميل و بيحب يلعب مع الناس".