خالد الغندور: الإعلامي لازم يكون محايد ومش مسموح يقول رأيه.. وكان حلمي أكون زي طاهر أبو زيد

كشف الإعلامي خالد الغندور، بداية مشواره الرياضي، وذكرياته مع نجوم الكرة المصرية، بالإضافة إلى الفرق بين الأجيال الحالية وجيله.

وقال خالد الغندور خلال لقائه مع برنامج “من غير نفسنة”، الذي تقدمه كلا من انتصار وبدرية طلبة ونوليا على شاشة “هي”، : الجيل بتاعنا واحنا صغيرين، كان بيعلق صور نجوم الكرة على الحيطة، قعدت فترة كبيرة من حياتي برا مصر، ومن وأنا صغير 3 سنين لـ 8 في فرنسا، وبعدها الكونغو، واتعلمت البلاد الأفريقية كانت خير، ومحدش بياخد حاجة من الشجر حتى لو فيها فاكهة.

واستكمل خالد الغندور: طموحات الطفل زمان أنه يلعب مع صحابه في الشارع، كنا زمان أفضل من دلوقت ، زمان كان الأجيال بتعتنا كل أحلامنا نلعب في الشارع أو الرمل أو اي حاجة، دلوقت الموضوع المختلف يلعبوا بلايستيشن في البيت، والمهارة قلت واللياقة البدنية، واللاعيبة بقت مصنوعة أكتر، دلوقت مراكز الشباب بتتأجر بيعملوا ملاعب نجيلة صناعي، بتتأجر بالساعة.

وتابع خالد الغندور: مشكلتنا في مصر إن 70 % أو 80 % أن ابنه هيبقى محمد صلاح، وأن اللاعيب بياخد ملايين كتيير ف بعد سنتين تلاته الولد هيصرف على العيلة كلها، المفروض الطفل من هو صغير لازم يتمرمط شوية ويتعود، ويروح مراكز شباب ويتعود ويتطور، ولازم يتأسس من سن 8 سنين، ولازم سقفه يعلى.

وقال خالد الغندور أن لاعب الأهلي السابق كابتن طاهر أبو زيد كان قدوتي وبحبه جدا وكان نفسي أطلع زيه وأنا صغير، والخطيب ، وجمال عبد الحميد، إسماعيل يوسف، وبحب شيكابالا في الجيل الحالي، وبحب محمد عبد المنعم في الأهلي لاعيب كويس، مؤكدًا: الإعلامي لازم يكون محايد ومش مسموحله يقول رأيه وحتى لو في قلبه حاجة.

برنامج “من غير نفسنة” تقدمه كل من الفنانة انتصار وبدرية طلبة ونوليا، يعرض يوميًا من السبت إلى الثلاثاء على شاشة “هي”، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.