مشوفتش رجالة اتحملت زي منى زكي في تحت الوصاية ومراتي مظلومة معايا.. أبرز تصريحات دياب

حل الفنان دياب ضيف على احدى البرامج التلفزيونية ، ويتحدث عن كواليس دوره في مسلسل تحت الوصاية.

دياب يكشف عن أصعب كواليس تصوير تحت الوصاية
قال دياب: أبشع كواليس تصوير مسلسل تحت الوصاية أن منى زكي وهي بتصور مشهد حرق المركب أيديها اتكسرت، وكملت تصوير بالرغم من أنها وقعت واحنا بنعمل البروفات للمشهد، واتحملت وأيديها ورمت وخدت مسكن وكملت وشوفت رجالة مبتعملش كدا.

وتابع: أنا كائن مش بحري أصلا، والجو ده جديد عليا وبحمد ربنا أن مكنش ليا مشاهد كتير في البحر.

وأضاف: مكنش مطلوب مني أوي أني أعرف حاجة عن البحر، لأن الدراما في الشخصية اللي بقدمها في الصراع بين صالح وحنان، بس أول ما وقفت على الرصيف في المينا بعزبة البرج حسيت أني بقيت واحد من الناس دي.

مشاهد تأثر بها دياب في تحت الوصاية
وعن أكثر المشاهد التى تأثر بها خلال مسلسل تحت الوصاية استطرد: "أنا عيطت وأنا بتفرج على مشهد في الحلقة 15، وهو بيني وبين الفنانة نهى عابدين لما قلت لها سكتك مش سكتى، ودي من المرات النادرة ليا إنى اتفرج على حاجة ليا وأعيط، ولكني تأثرت جداً بالمشهد ده".

وأردف "حينما كلمني محمد شاكر خضير، وقرأت الورق وجدته مميزا للغاية، والشخصية الذى أقدمها رمادية للغاية، وعمري ما شفت صالح شرير بالمناسبة، فهو عليه ضغوط جعلته يظهر بهذا الشكل، وبالتالي فإن الشخصية مختلفة وثرية جداً".

علاقة دياب بزوجته
وتطرق في حديثه عن زوجته مشيرًا إلى إنه يحب زوجته ولا يطيق تركها تنام وهي «زعلانة» منه لأنه يحبها للغاية، ويتمنى أن يراها دائمًا سعيدة.

واستكمل:«أنا عندي بس مشكلة إني بتخانق مع ناس وأنا نايم لأني مبحبش أزعل حد وأنا صاحي، عشان كدا باخد حقي من الناس وأنا نايم، وغصب عني بضربها وأنا مش قصدي وهي يا حببتي مظلومة معايا، عشان كدا أنا المفروض أنام في استاد مش سرير».

وأوضح دياب: «الجملة بتاعة باشا مصر أخدتها من واحد صاحبي اسمه أشرف، كانت دائمًا تلازمه لأنه كان عارف ضُباط كتير، عشان كدا أنا استأذنته نقولها في المسلسل».

واختتم حديثه قائلًا: «أنا أصلًا بحب بيتر ميمي جدًا هو وكرارة، وأول ما اتعرض عليا الشغل في المسلسل، قلت لأمير أنا معاك أنت وبيتر لو داخلين حرب».