قبل عرضه.. تفاصيل شخصية أحمد طارق بطل مسلسل ليه لا3

كشف الفنان أحمد طارق، تفاصيل شخصيته في مسلسل ليه لأ 3، بطولة الفنانة نيللي كريم، قبل عرضه بأيام قليلة، على منصة شاهد VIP.

وقال أحمد طارق، خلال لقائه مع احدى البرامج : بقدم شخصية كريم شعلان، هو رجل أربعيني، مطلق، وعايش حياة بسيطة عادية، وبيمر بظروف اجتماعية، وبيقع في ظروف بتخليه ياخد قرارات مصيرية، وإنه يكون أقل أنانية، ويعمل اللي يسعد اللي حواليه على حساب هو عايز إيه.

وأضاف: شخصية كريم بتعكس الشخصية المتوسطة بظروفها الاجتماعية البسيطة، وكل المشاهد في العمل بالنسبالي صعبة، بس أصعب لحظة لما وقفت قدام الفنانة نيللي كريم، وبمثل معاها لأول مرة، وكنت مخطوف طبعًا وحاسس إني مش عارف أعمل إيه.

وكشف أحمد طارق أوجه التشابه بينه وبين شخصية كريم في المسلسل، قائلا: الظروف المشتركة بينا أنا وشخصيتي في العمل، إن أنا كمان مطلق، وسننا قد بعض كمان، وارتباط الشخصية بوالدته زيي في الحقيقة.

واختتم حديثه قائلًا: مسلسل ليه لأ يميزه إنه بيناقش مشكلات اجتماعية موجودة في حياتنا بس محدش بيتكلم عنها بشكل مباشر، وهو بيتناولها بشكل واسع، وبعتبره تجربة جديدة عليا وتحدي ساعدني أطلع حاجات جوايا أول مرة الناس هتشوفها.

مسلسل ليه لأ 3

وينتظر الجمهور عرض الجزء الثالث من مسلسل ليه لأ 3، خلال الأيام المقبلة، عبر منصة شاهد VIP، والعمل بطولة الفنانة نيللي كريم، وأحمد طارق، صلاح عبد الله، نادين، معتز هشام، عايدة رياض، وغيرهم من الفنانين.