”صرخة زوجة” أمام محكمة الأسرة: ”جوزي بيخوني مع جارتي ولما قفشته اتحجج باللمبة”

زادت قضايا الخلع بشكل ملحوظ في الفترة الأخيرة في أروقة محاكم الأسرة ، وتتعدد الأسباب و المبررات الغريبة والغير منطقية للزوجين ما بين الخيانة و العادات الغريبة و الإدمان وغيرها، من يدفع إحدى الطرفين لإنهاء العلاقة الزوجية لتضرره من الطرف الآخر.

تروي الزوجة المكلومة بعيون الأسى معاناتها مع خيانة زوجها قائلة :جوزي عينه زايغه عينه على البنات في الشارع طول ما هو في الشارع، متجوزين من سنتين بس و حياتي معاه جحيم من تصرفاته و سلوكه مع الستات في الشارع ورددت كل يوم الستات تشتكي ليا من تصرفاته معاهم و بقيت مش قادرة أرفع رأسي في المنطقة، و الناس لسانهم مش بيرحم و إحنا لسه متجوزين ملحقش يزهق مني.

وتابعت الزوجة:الصدمة اللي بتعالج منها نفسيا لحد النهارده هو خيانته ليا مع جارتي ورددت جارنا رجع من الشغل لقى جوزي مع مراته في أوضة النوم، لقيت جارنا بيدور عليه في كل مكان و بيسألني جوزك فين و لما سألني كانت الكارثة متوقعتش أن الموضوع يوصل للخيانة قولت دي طبيعية رجالة و كلهم عينيهم زايغة.

وأكملت الزوحة:لما واجهته جوزي بخيانته رد عليا أنتي عارفه إني كهربائي و الست اللمبة حرقت كنت بغيرها ليها، مصدقتش كلامه كل حاجه واضحة زي الشمس "بيركب اللمبة على السرير في أوضة النوم" مش منطقي، حاولت معاه كتير أوي إني اغير منه لكن هو مصمم و عينه مش بيشيلها من على الستات في اي مكان يروحه.

واختتمت الزوجة: تعبت معاه ومفيش نتيجة بيعاكس و يحاول يكلم البنات، سبت البيت وروحت على بيت أهلي، بعدها عرفت إن الجيران ولعوا في شقتي بعد ما سبتها بسبب تصرفاته وسلوكه مع ستات المنطقة، طلبت منه الطلاق هرب من أهلي، فقررت أقيم دعوى خلع والتي تحمل رقم 429 لسنة 2022 أمام محكمة الأسرة بالتجمع الخامس ،ولم يتم الفصل بها حتى الآن