أرملة أحمد راتب: عشنا أيام صعبة ولما ربنا كرمنا كان بيعمل موائد رحمن لمدة 18 سنة

تحدثت السيدة فيرا أرملة الفنان أحمد راتب، عن الأزمة المالية التي واجهتها وزوجها في بداية الزواج، مُشيرة إلى أنها كانت تقترض المال من والدتها لسد احتياجاتهم.

وبحسب «فيرا»، في تصريحات تلفزيونية: "في الفترة الأولى من زواجنا قعدنا حوالي سنة ظروفنا المادية كانت صعبة، وأنا ما حسستهوش بدا خالص وكنت أطلع اتفرج على التليفزيون عند جارتي علشان مكنش عندي تليفزيون، لدرجة إني كنت بروح لماما أستلف منها، وكنت أقول لها إديني جنيه علشان أحاسب التاكسي لأن معايا 10 جنيه مجمدة لأني مكنتش أحب أقولها إن مفيش معايا فلوس".

وأضافت: "كنت بركب أتوبيس من الجنيه والباقي تاني يوم ناكل منه، كان جوز الحمام وقتها بجنيه وكنت بروح أجيبه وأعمله، وعمري ما كنت أقول لـ ماما إن مفيش فلوس وهو مجوعني، ودي مواقف خلته يحس إني سند وستر ليه، لغاية ما ربنا كرمنا، وكان بيعمل موائد رحمن لمدة 18 سنة".

وكشفت السيدة فيرا، سر استمرار زواجهما لمدة 38 عامًا، قائلة: "أهم حاجة الصداقة ونبقى متفاهمين ونحكي لبعض كل حاجة دي أهم حاجة والقرب في الأفكار، ومحاولة إن اهتمامتننا تكون واحدة، وزميلاته إخواتي والوسط متفاهمين وقريبين من بعض والمعجبات يعتبر إنهم نوع من شغله عمره ما اداني إحساس إني أغير".