منال سلامة: أميرة بنتي بقت أشهر مني وكانت بتعلم الرقص علشان تصرف على نفسها

كشفت الفنانة منال سلامة عن طريقة تربيتها لأبنائها، مُشيرة إلى أنها عودتهم على الاعتماد على أنفسهم، خصوصًا ابنتها الفنانة الشابة أميرة أديب.

وبحسب «سلامة»، في تصريحات إذاعية: "أميرة بقت مشهورة أكتر مني، هي شاطرة وموهوبة وعملت كل حاجة من نفسها ومن صغرها ما تعبتنيش".

وتحدثت عن ابنيها أميرة وعلى، قائلة: "لما درسوا برا مصر كان مصروفهم محدود جدا، كانوا بيشتغلوا وهما طلبة، ابني كان بيشتغل بيقطع شجر ويشيله، وأميرة كانت بتنزل تعلم رقص وتاخد 50 جنيه".

وتابعت منال سلامة حديثها: "أنا أبويا رباني على أني إنسان مش بنت، مفيش فكرة الولد والبنت، أنا كنت البكرية وكان بياخدني معاه على القهوة، أنا تربيت باكره كلمة راجل أنا إنسان، وربيت أميرة وعلي على كدا، اتربوا على نفس القيم والمبادئ، أميرة بتسافر بالشهر وتقعد في أماكن بـ3 دولار في اليوم، مرة حجزت في مكان واتنصب عليها ونامت على البحر".

واختتمت «سلامة»، تصريحاتها، قائلة: "أميرة بتحب السفر في حاجات بتجهزها وحاجات بتسافر على باب الله، أنا سيباها تعتمد على نفسها أنا بربيها على أني مش عايشالها طول العمر، وأنا ربيتهم يعيشوا في مستوى بسيط ومستوى عالي، يقعدوا على الطبلية ويتعاملوا مع الناس بمنتهى البساطة ولو تواجدوا في مكان 7 ستار تتعامل بنفس الطريقة".

يُشار إلى مشاركة منال سلامة في بطولة مسلسل «الأصلي»، الذي يعرض عبر قناة dmc ومنصة watch it، تأليف أمين جمال، وإخراج أحمد حسن، ويشارك في بطولته مجموعة مميزة من النجوم، على رأسهم ريهام عبد الغفور وحمزة العيلي وفتوح أحمد وأحمد كشك وإيناس كامل وشاهيست وإسلام جمال.