عمرو أديب للقائمين على الحوار الوطني: انتوا فين بلدنا في مفترق طرق

قال الإعلامي عمرو أديب: "الحرب الروسية الأوكرانية لسه مستمرة ولذلك المشوار لسه طويل وفيه حاجات كتير ممكن أن نواجهها، لذلك اعتبر 2023 عام التكافل والتعاون في ظل الظروف المعيشية الصعبة".

وتابع خلال برنامج "الحكاية" المذاع علي قناة "إم بي سي مصر": "الروس عندهم قناعة أن الحرب لو طولت الاقتصاد الأمريكي يسقط والأمريكان في رأيهم أن إطالة الحرب يعني سقوط الروس، وفي واقع الأمر أن أمريكا وروسيا بعندهم هيسقطوا الكرة الأرضية كلها وهما بيبهدلولنا معاهم".

ولفت: "بعد حديث الرئيس السيسي اليوم سألت نفسي سؤال فجأة وانتبهت عليه هو فين الحوار الوطني؟ الحوار الوطني فيه لجنة اقتصادية فيه عقل البلد الاقتصادي انتوا فين يا جماعة؟ وهتتكلموا امتي؟ بتعملوا ايه؟ متى نرى توصيات اقتصادية من الحوار الوطني اللى فيه خيرة العقول الاقتصادية في مصر؟ يا جماعة بتوع الحوار الوطني انتوا بتخشوا المغارة ومبتتطعلوش، اطلعوا اتكلموا ولا هتتكلموا لما الأزمة تخلص؟، بقالنا سنة الحوار الوطني لسه شغال في تشكيل اللجان؟ لو بيكونوا كيان الاتحاد السوفيتي كان زمانهم خلصوا، انا مش احد اللاعبين ولكن كل دوري هو الوصف".

وأكمل: "عملتوا لجنة ضخمة فيها عقول مصر الاقتصادية والسياسية وبقالهم سنة معملوش حاجة، يا جماعة الدولة في مفترق طرق وتحتاج إلى كل نصيحة انتوا بتعملوا ايه؟ الرئيس السيسي في حاجة لكم، بقول للناس بتوع الحوار الوطني انيروا لنا الطرق شايفين ايه هل عندكم اقتراحات يمكن أن تغير ظروفنا وأوضاعنا الاقتصاد العام بيوصل لعم إبراهيم الغلبان لو الاقتصاد جيد عم إبراهيم يبقى وضعه جيد، أهيب بكم انهم يقدروا يعملوا شئ جيد وجايز يكون فيه شئ معطلهم".