فيديو.. سلوى عثمان: شغلي خط أحمر مع أي حد أتزوجه

أكدت الفنانة سلوى عثمان أن عملها يمثل "خطر أحمر" في علاقتها مع من تتزوجه، موضحة أنها وضعته شرطا في عقد زواجها الحالي.

وقالت سلوى عثمان، خلال حلولها ضيفة على برنامج "كلام الناس" على قناة mbc مصر: "بتفق أني عمري ما هسيب شغلي وحطيت بند في عقد زواجي من زوجي الحالي علشان الشغل، والمأذون سألني في شرط عاوزه تحطيه في العقد قلت له إني ما أسيبش شغلي".

وأضافت: "زوجي الحمد لله حابب شغلي ومتفهم، وعارف أني بكون مشغولة في رمضان وساعات بنبات في الشغل وعنده فكر ومحتوي الموضوع".

وتابعت: "مع ذلك أنا مش بقصر معاه في البيت مش معنى إني مشغولة ما عرفش حاجة عن هدومه وشغله لكني عندي ترتيب في حياتي أني ما أقصرش".

ومضت مضيفة "الشغل رقم واحد في حياتي، وبحاول أيضًا أن زوجي يكون رقم واحد وبكون مسؤولة عن كل شيء يخصه من لبس وأكل". وكشفت أنها تزوجت مرتين، وآخر زواج لها من 15 سنة.

وأكدت سلوى عثمان أن أهم صفة يجب أن تتواجد بين الزوجين هي التفاهم، فالزواج عمره أطول أكثر من الحب، موضحة: "الحب ممكن يروح لأسباب مختلفة لكن لو متفاهمين هيقدروا يكملوا الحياة الزوجية".

واعتبرت الفنانة المصرية أن "الخلافات لازم تكون متقبلة بين الطرفين لأني ممكن أقبل عيوب في جوزي، وواحدة تانية ما تقبلش بيها والعكس لأننا مش ملائكة وكلنا عندنا عيوب وكل واحد له شخصيته ولازم يكون فيه تفاهم".

وأضافت: "فيه حد لازم نقف عنده من غير ما نعديه وده نوع من التفاهم، في حاجات ممكن تعديها وحاجات لأ، أنا مثلًا عصيبة أكتر منه وهو بيكون هادي وساكت وهو لما يتعصب بهديه، وكل واحد فينا بيستحمل التاني، لكن العصبية ليها حدود ما ينفعش يدخلوا في مناطحات وألفاظ مش لذيذة".