أغرب رد من باسم سمرة على معجبة طلبت منه الزواج

بجرأة غير معتادة، كشف الممثل المصري باسم سمرة بعضا من خفايا حياته الشخصية وعلاقته ببناته ورأيه في أدواره خلال استضافته بأحد البرامج.

وتحدث سمرة، خلال لقائه مع الإعلامي عمرو الليثي في برنامجه "واحد من الناس"، عن حياته الزوجية قائلا: "قبل ما أتجوز كنت راجل مقطع السمكة وديلها، بس دلوقتي لا عشان خلاص كبرنا وبقى عندنا عرايس".

وأضاف: "أنا مراتي بنت عمي، وأنا زوج عملي ومش رومانسي خالص، وبحب أحافظ على البيت وبحب كل حاجة تبقى مترتبة وبتوقيتات".

وتابع: "أنا صاحب الكلمة في البيت، مش عشان الذكورية ولا حاجة بس بما أن أنا أكتر خبرة وحريص على بيتي وبحب بيتي جدا، والمركب اللي ليها ريسين بتغرق".

وبكل صراحة كشف سمرة جانبا من شخصيته، قائلا: "أنا مش مودرن، لو شايف الحاجة صح هعملها".

وحكى الممثل باسم سمرة موقفا غريبا حدث معه من معحبة، قائلا: "في مرة معجبة جات قالتلي عايزة اتجوزك قولتلها كلمي مراتي لو وافقت أنا تمام".

وكشف سمرة عن أنه كان يرغب في إنجاب ولد لكن لم يقدر الله، قائلا: "كان نفسي يبقى عندي ولد، بس عشت تجربة كانت قاسية جدا لما عملنا محاولة والبنت توفت بعد شهرين من الولادة، فأثرت فيا جدا وحمدت ربنا على اللي عندي".

عن علاقته ببناته، أوضح باسم: "بحب بناتي ومش هجوزهم، هقعدهم معايا، وهما بيحبوا الحيوانات جدا والخيل والزراعة والرسم والرحلات".

وتحدث الممثل عن هواياته، وقال إنه يحب القراءة وركوب الخيل وكرة القدم، مستطردا أنه يتابع فريق "ليفربول" الإنجليزي لحبه للاعب محمد صلاح.

وأضاف :"أنا أهلاوي ولكن الكرة بقى فيها عنف وتعصب بين الجمهور، الكرة في مصر أصبحت مختلفة".

باسم سمرة و"عمارة يعقوبيان"

تحدث الممثل المصري عن دوره في فيلم "عمارة يعقوبيان"، ورأى أنه كان جريئا للغاية لكنه كان السبب الأساسي في شهرته، متابعا: "الدور كان مختلف ومقلقتش عشان كان معايا عادل إمام".

وأكمل: "كان نفسي أقدم دور ابن البواب ولما قرأت دوري في الفيلم اتخضيت ولكن بعدها أدركت قوة الدور".

وأضاف سمرة: "أنا حريص في اختيار أدواري وأعمل دائما على التجدد، وبزعل لما أكون ضيف شرف في فيلم او مسلسل وماخدش فلوس ولاقيهم حاطين اسمي وصورتي كنوع من أنواع الدعايا".

وكشف أنه كان يتمنى تقديم دور "حسن الصباح زعيم الحشاشين"، مضيفا: "الفنان كريم عبدالعزيز هيقدم دور حسن الصباح زعيم الحشاشين وسعيد للغاية".

وتحدث عن دور كبير لعبه الراحل خالد صالح عندما كانا يصوران مسلسل "الريان"، قائلا إنه ساعده كثيرا أثناء تصوير المسلسل، متابعا: "مكنتش هعمل الدور لكن طارق لطفي اعتذر عن المسلسل".

وفجر الممثل مفاجأة عندما قال إن الممثلة نيللي كريم استفادت منه في مسلسل "ذات"، وقال: "نيللي كانت لسه في بدايتها، وكانت بتتفرج عليا أنا وانتصار ماكنتش عارفة تقول كلمتين على بعض".