ليلة مقتل شيماء.. ماذا حدث في مشاجرة بولاق الدكرور؟| خاص

حصلت "جريدة النهار المصرية"، على نص التحقيقات في قضية مقتل الطفلة شيماء مجدي صاحبة الـ ١٣ عامًا، والتي لقت مصرعها في منطقة بولاق الدكرور إثر طلقة نارية استقرت بفكها، لتلفظ الفتاة أنفاسها وسط بركة من الدماء.

وكشف الشاهد "مصطفى.أ"، تفاصيل مقتل الطفلة في تبادل لإطلاق النيران في منطقة بولاق الدكرور، مضيفًا أنه حمل المجني عليها وهرول مسرعًا للمستشفى ولكنها فارقت الحياة على الفور.

وإلى نص التحقيقات:

س/ ما علاقتك بالمجني عليها؟

ج/ أنا أبقا جار المجني عليها وشوفتها لحظة ما اتصابت ووقعت.

س/ ما معلوماتك بشأن الواقعة؟

ج/ أنا شوفت الطفلة شيماء بتستخبى من ضرب النار اللي كان حاصل عندنا في الشارع بين مجموعتين، مجموعة سمير صبري ومجموعة "قوطة"، وهي مكانتش عارفة تروح فين ومرة واحدة لقيتها وقعت على الأرض وبتنزف دم كتير من بقها.

س/ وما سبب تواجدك بالمكان سالف الذكر؟

ج/ أنا كنت قاعد على القهوة، وكنت قايم مروح بيتي ولقيت الخناقة وضرب النار شغالين فوقفت متداري عند جزارة ومن هناك شوفت المجني عليها وهي مش عارفة تروح فين من الضرب.

س/ من كان برفقتك آنذاك؟

ج/ كان فيه ناس كتير بس كانوا بيستخبوا في القهاوي والبيوت.

س/ وما الذي شاهدته تحديدًا؟

ج/ شفت سمير صبري واللي معاه واقفين على أول الشارع ناحية محل العصير، و"قوطة" واللي معاه واقفين الناحية التانية وبيضربوا بعض بالنار والشماريخ والصواريخ، وشوفت المجني عليها مرة واحدة وقعت على الأرض فجريت أشوف مالها فيه إيه لقيت وشها مليان دم.

س/ وما سبب نشوب المشاجرة بين الطرفين؟

ج/ اللي عرفته من أهالي المنطقة إن "قوطة" واللي معاه اتعدوا قبل كدة على سمير صبري واللي معاه والخناقة دي كانت بسبب أنهم بيردوا عليهم، وبينتقموا.

س/ وكيف حدثت إصابة المجني عليها تحديدًا؟

ج/ جالها طلق ناري جنب بوقها وبدأت تنزف منه دم كتير.

س/ وما الذي بدر منك آنذاك؟

ج/ جريت بيها بسرعة ألحقها وروحت بيها على مستشفى الزهراء، ومنها على مستشفى الأطباء عشان ألاقي حد يسعفها.

س/ ومن كان تحديدا يمسك بيده السلاح الناري؟

ج/ سمير صبري كان ماسك المسدس في إيده وبيضرب بيه نار.

س/ هل توجد أي علاقة أو خلافات بينك وبين المتهمين؟

ج/ لا أنا مليش علاقة بيهم خالص وأعرف بعضهم بس بحكم أنهم مشهورين في المنطقة بالمشاكل والمخدرات.