بسملة بنت سوهاج الخامسة على مستوى الجمهورية لـ ” النهار ”: حلمت بالتفوق و تمنيت سياسة واقتصاد و الحمد لله الحلم أصبح حقيقة

سوهاج : عبير أبو المعارف

بسملة بنت سوهاج الخامسة أدبى على مستوى الجمهورية نموذج حقيقي للطلبة الذين استطاعوا أن يحققوا نتيجة رغم الضغط والظروف الغريبة اللي بنشوفها حوالينا، وتغيير للقرارات كل فترة، أجتازوا هذه الظروف بكل التحديات بطموحهم وبمنتهي الاجتهاد والمصداقية مع أنفسهم هنتعرف على بسمله وظروفها

من خلال حواري معها عبر الموقع الإلكتروني للنهار..

-- مبروك يابسملة النجاح العظيم والتفوق المبهر .

- الله يبارك في حضرتك شكرا لك

- - ماذا كان شعورك عندما علمك بانك ضمن العشرة الأوائل على مستوى الجمهورية ؟

- صراحة أحساس جميل كان شعور مميز خضة مع فرحة كبيرة

--هل كنتِ متوقعه تحصلي على مركز مع أوائل جمهوريه؟

- الصراحة كان نفسي اطلع من الأوائل، والمدرس بتاعي كان متوقع لي دا ، لكن بعد امتحان التاريخ وعلم نفس كان صعب، حسيت مش أقدر أحقق حلمي .

-- أوصفي لنا عن اكثر لحظه فرحتي فيها بنجاحك ؟

- بصراحة وقت ما وكيل الوزارة دكتور عربي ابو زيد كلمني يباركلي، كنت سعيدة جدآ وفرحانه وحاسة اني حد مهم وعملت حاجه حلوة خاصة أما قالي انه فخور بيا وإني حاجه مشرفة وبيتمنالي أستمر فى النجاح والازدهار ..

-- حديثنا عن تجربتك، كيف كانت تنظيم الدراسة واوقات المذاكرة ؟

- الحقيقه كنت بذاكر مش عدد ساعات معينهبقدر ماكنت بحدد لنفسي كميات معينة أخلصها من المادة اللي محددها بالجدول، وكنت اذاكر من خلال الفهم والحفظ أكتب مع المستر كل الشرح واذاكر بعدها كل كلمه، دا كان بيساعدني كتير في المذاكرة.

-- لمن تهدي هذا التفوق والنجاح؟

-اهدي نجاحي لبابا وماما واسرتي واستاذي المفضل مستر

أحمد عادل مدرس التاريخ والجغرافيا اللي دايما كان يشجعني

-- بما إنك كنت طالبة ثانوي عام متفوقة ماهي نصيحتك لطلاب ثانوية عامة العام القادم؟

- أقول لا تؤجل عمل اليوم إلى الغد بمعنى انك تذاكر أول بأول هتفرق كتير في المذاكرة والتحصيل

-- قررتى هتدخلى كلية أيه ؟

-كان نفسي من زمان سياسة واقتصاد، وبإذن الله سياسه واقتصاد.

-- من تحبى توجهى له الشكر ؟

- أقول شكرا لبابا وماما دعمكم لي المعنوي، كان مهم أوي لي، واللي كان بيخليني اثق في نفسي اكتر، شكرآ كنتم دايما بتشجعوني ومن وقت للتاني بتخرجوني أجدد نشاطي وطاقتي، شكرا كمان للدعم المادي، دايما كنتم موافرين ليا كل حاجة مذكرات واي ملخص ينزل كنت اشتريه. شكرآ ماما وبابا ..