قصيدة : أد التحدي ” إلى روح البطل الشهيد محمد الحوفي ”

شعر د. هانى أبو الفتوح

الوِشْ ده عارفه أكيد
مكتوب على وِشه شهيد
وفى وقت عصرية هناك
واقف ملاك
يحرس في ناسها من بعيد
ومعاه شوية من حياة
آخر ساعات مستنياه
لا هَزُه خوف
ولا صوت بارود
في مقدمة سابق الجنود
بيقول خلاص الليلة عيد
واقف بطل أسد جسور
واقف ملاك
وف وشه نور
والغدر خاين أو جبان
يفتح نيرانه عالصدور
وقت البعاد كان المعاد
ومعاد بطلنا يكون هناك
عند رب العالمين
أد التحدي يا بطل
يقول آمين
لبى الندا وكاد العدا
وبأعلى صوت يصرخ يقول
طالب الشهادة لازم ينول
أنا البطل أد التحدي
طالع على الجنة
وبدمي بتحنى
مين الليلة أَدي ؟!
وملايكته واقفه هناك
مستنيين
شاهدين بأن الحوفي صان
عرض ودين