مى حلمى تعد جمهورها بكشف حقيقة إلغاء حفل زفافها

للمرة الثانية بعد واقعة إلغاء حفل زفافها على المطرب الشاب محمد رشاد، نشرت الإعلامية مى حلمى، عبر حسابها الشخصى بموقع انستجرام، تعليقا عن كواليس الحدث الذى شغل مواقع التواصل الاجتماعى على مدار الأيام الماضية.

وقالت مى "مش عايزه اتكلم فى أى حاجه غير عن وجع كسرة الفرحه، ولا إعلام ولا ميديا ولا دنيا ولا مين شمتان ولا مين فرحان مش فارقلى، كلنا بندور على الفرقعة على السبق اللى يضرب بس لو هتكلم عن نفسى عمرى ما هعمل كده وقت غياب فرحه حد ومش أى فرحه دى فرحه العمر زي ما بيقولو.. ازاى؟ ازاى قدرتو تعملو كده لكل الناس وأولهم القريبين، ازاى قدرتو تقولو كلام غلط وحكايات ماحصلتش ازاى سبتو فرحتنا على جمب؟".

وتابعت "عارفين يعنى إيه بعد ما البس فستانى أقلعوا؟ بعد ما خلاص خطوه واحده من 4 سنين مستنياه تبوظ بسبب الناس اللى نقلت كلام غلط مش هقول الميديا، الميديا طول عمرها كده وقبل مااشتغلها وأنا عارفه إنها كده نتكلم عن الناس الطبيعية.. إزاى قدرتوا تشمتو وتفرحو فى وجع غيركم واللى يدعى واللى يضحك واللى يقول أحسن، فهمونى انتوا بنى آدمين؟، بتخافو ربنا ؟..  طيب حتى لو نفرض وده فرضا أن حد من الطرفين غلطان ليه الدعى عليه والحسبنه ليه أصله مش هزار هتقوم من النوم تدوس عليه فهتنسى العشره والسنين وتقعد تدعى وتهين لا لا ابدا مهما حصل بتلاقى نفسك مش طايق كلمه وحشه على الطرف التانى ونفس الكلام للطرف الآخر".

وأضافت مى، فى تعليقها "بعد الهيصه والزيطه مابيفضلش غير الحلو وبيبان الوحش بس كل اللى عايزه اقولوا الشدد بتبين، فى الآخر حبيت أخرج كلام جوايا من اللى شوفته اليومين اللى فاتو والله والله مافرق معايا غير فرحتنا أنا وهو مش أنا بس اللى اتكسرت فستانى اللى قلعته بدلته اللى اتقلعت ومحدش فاهم حاجه أهالينا اللى زعلانين علينا".

وتابعت "ماكنتش ناويه اتكلم بس كلام جوايا وكنت عاوزه اقولو محدش بيرضى فى عشرة عمره لو عامل فيه ايه مابيرضالوش الوحش ولا دعوه واحده بالغلط عشان ماحدش كان عارف ايه اللى حصل معظم الناس أنا كنت هناك أنا كنت حاضر أنا كنت شاهد.. كنت دعيت ربنا يهدى الدنيا ويجمعهم فى الحلال بدل ما كنت حكيت اللى سمعته مش اللى شوفته إحساس صعب فرحه عمرك تتكسر قدامك بعد سنين مستنيها ساعتها ولا بيفرق شكل من كلام ناس من دنيا فرحه فستان".

واختتمت تعليقها، بإعلان عودتها للإذاعة مرة أخرى فى وقت قريب وستكشف القصة كاملة حينها "بتاعت الراديو راجعه راجعه إن شاء الله هنحكى كل حاجه وهنقول كل حاجه بس فى الوقت اللى احنا عايزينه مش اللى الناس عاوزاه".

ووجهت نصيحة للمقبلين على الزواج " نصيحه من قلبى لكل اتنين متجوزين عايزين يسيبو بعض لكل اتنين مخطوبين لكل اتنين بيحبو بعض "الحب مابيتبعش" ولو ضيعتوه والله مابيجى تانى امسكو فيه مهما حصل".

على أن علاقتها مع رشاد مازالت قائمة، لكنهم يفضلا الابتعاد عن الأضواء والظهور "أكيد هنطلع ونتكلم بس ادونا شويه فرصتنا مع بعض بعيد عن الأضواء، وعاوزه دعوه حلوه لينا أرجوكم"، ويأتى هذا بعدما تم إلغاء حفل زفاف الفنان محمد رشاد، على خطيبته الإذاعية مى حلمى، يوم السبت الماضى، قبل ساعات قليلة من إقامته داخل أحد الفنادق بالقاهرة، إثر خلاف حاد نشب بينهما.