أحمد أمين يقدم الوصايا العشر للعام الجديد.. «ادفع اشتراك الجيم واعتبره زكاة»

"الوصايا العشر".. هكذا وصف الإعلامي الساخر أحمد أمين نصائحه التي وجهها للجمهور قبل ساعات من حلول العام الجديد 2017.

وبالنسبة للوصية الأولى، قال "أمين" خلال برنامجه "البلاتوه"، المذاع على قناة "النهار"، الجمعة: "كل واحد فينا بتاخده الجلالة ويكتب جدول طويل عريض بالمهمات التي سيفعلها في العام الجديد، ولكن الحقيقة إن الجدول دا أول حاجة لازم نبطل نكتبها، لأن أي حاجة بنحطها في جدول مابتتحققش ودا من أيام المذاكرة".

وأضاف أن الوصية الثانية تتعلق بمصارحة الشخص بعيوبه، قائلا: "لازم مصارحة حقيقية بالعيوب، مش تقول لنفسك مشكلتي صدقي الشديد وقلبي الكبير ووخزة الضمير، بلاش جو المحن دا".

أما النصيحة الثالثة، فتتعلق بتحسين العلاقة بين الشخص وأسرته، مضيفًا: "هفتح صفحة جديدة على فيس بوك، عشان مراتي قفشت الاولانية، ونصيحة رابعة مني بلاش تضيف فيها ولادك ولا تاريخ ميلادك".

وتابع موجهًا النصيحة الخامسة: "بلاش أي هري على الفيس بوك نقول رأينا فيه، يعني لو ماعندكش رأي اسكت، وماتقلقش مش هتموت لو ماكتبتش تعليق أو بوست".

ووجه الإعلامي الساخر النصيحة السادسة لرواد معرض الكتاب: "أرجوكم أقروا الكتب الكتير اللي بتجيبوها، وخلي شعاركم في السنة الجديدة مش هخلي في بيتي كتاب ما قرأتهوش أو بيعوها لبتاع الروبابيكيا".

ونصح الجمهور بالاشتراك في "جيم" وهي النصيحة السابعة التي وجهها لهم، قائلا: "أنا عن نفسي هعمل كدا، ومش مهم أروح ولا ماروحش أو ألعب ولا مالعبش، وفلوس الاشتراك ممكن نخليها زكاة عن صحتنا وعافيتنا".

أما النصائح الثلاثة الأخيرة، فقالها "أمين" بطريقة ساخرة، قائلا: "شيل الخوازيق وبلاش تكون كل مشكلتك طيبة قلبك وأخيرًا بلاش مع بداية كل سنة تقول (هسيب شغلي الروتيني وافتح مشروع واكسب وأبقى مشهور)".