فيديو.. «الميرغني»: «كل الأندية رفضاني بعد تويتة انتقاد السيسي»

روى أحمد الميرغني ، لاعب نادي وادي دجلة السابق، أن «رفض الأندية المصرية له بسبب تويته انتقد فيها الرئيس عبدالفتاح السيسي ».

وقال «الميرغني» في حوار مع برنامج «اللعبة الحلوة» على قناة LTC، مساء الجمعة: «كلمني بلال نظير، وقالي الاتحاد السكندري عايزينك، قولتله معنديش مشكلة، وبعدها بكام يوم محصلش اتفاق والسبب التويته».

وأضاف «الميرغني»: «نادي سموحة أحد وكلاء اللاعبين قالي الكابتن محمد يوسف عايزك، فقولتله تمام، فالكابتن محمد يوسف قالي هكلم الإدارة، واترفضت من فرج عامر».

وتابع: «نادي حرس الحدود والشرطة، رفضوني كمان»، مضيفا: «أنا كل اللي عايزه ألعب كورة تاني».

وواصل: «كابتن محمد جمال، قالي الشرطة محتاجك، والكابتن خالد القماش، قالي تعالى بكرة هنمضي العقود، بعدها بيومين قالي معلش الدنيا هتتأخر شوية، وبعدها كلمني بعدها بيوم، وعرفت أن أحد مساعدي الوزير قاله الوزير ممكن يقفلنا النادي لو الشخص ده لعب في النادي».