هاشتاج «كلب شارع الهرم» الأكثر تداولًا على «تويتر»

     دشن عدد من شباب مواقع التواصل الاجتماعي، هاشتاج «كلب شارع الهرم»، ردًا على الفعل المشين الذي ارتكبه عدد من الشباب بذبح «كلب»؛ انتقاما منه، بعدما عقر ثلاثة أشخاص، حاولوا ضرب صاحبه.

كان محمد السيد صاحب «كلب الهرم»، روي خلال مداخلة هاتفية بالإعلامي وائل الإبراشي مقدم برنامج "العاشرة مساءً" على شاشة "دريم2"، تفاصيل ذبح كلب على يد بعض الأشخاص بطريقة وحشية قائلا: «أنا نزلت مرة الشارع وكان معايا الكلب، وهو مش مترخص بس أنا مربيه تربية عالية، مش هيأذي حد، وفي اليوم دا جري ورا قطة في الشارع، لقيت واحد بيقولي حوش الكلب بتاعك، فقولتله هو مش هيعمل حاجة، فحصلت مشاجرة بيننا، الكلب لما شاف الراجل بيضربني جه وهجم عليه، بس أنا شيلته عنه ومضرهوش".

وأضاف: «الشخص اللي اتخانق معايا، اتصل بناس تبعه وفجأة لقيت نحو 40 واحد معاهم سلاح أبيض وجايين يتخنقوا معايا، وأنا لوحدي فسبت الكلب يجري وراهم، وبالفعل جريوا من قدامه، وناديت عليه رجعلي تاني، وأول ما رجع الناس هجمت عليا فهو دافع عني وعض 8 منهم".

وتابع، "فوجئت تاني يوم إن الشخص دا وأصحابه قدموا بلاغ ضدي، وفضلت 4 شهور برا البيت عشان خايف البوليس يقبض علي، وبعدها عملنا قاعدة عرفية وصالحت الراجل بس الناس اللي معاه اشترطوا عليا إني أسلم لهم الكلب عشان يقتلوه، مقابل إنهم يتنزلوا عن المحضر، حاولت إرضاءهم بأي حاجة تانية رفضوا".

وقال محمد باكيا، "أنا مقدرتش أسلم لهم الكلب، واديته لواحد صاحبي سلمه للأهالي، وشفت اللي عملوه مع الكلب بعنيا ومقدرتش أعمله حاجة، مع أنه كان وفيا لي، كل ضربة نزلت عليه وجعتني أنا".