تفاصيل أزمة محمد سامي وعمرو سعد حول الأعلى مشاهدة في رمضان

إشتعلت حرب الأعلى مشاهدة في دراما رمضان 2026 بعدما رد المخرج محمد سامي بشكل مباشر على تصريحات الفنان عمرو سعد بتصدر مسلسله " إفراج" الأعلى نسبة مشاهدة في الموسم الرمضاني، وفي السنوات العشرة الأخيرة، حيث أوضح سامي أن الأعلى مشاهدة هو مسلسله جعفر العمدة بطولة الفنان محمد رمضان، مستنكرًا تصريحات عمرو سعد.

وقال محمد سامي، من خلال فيديو عبر حسابه على فيس بوك: فكرة رقم واحد لفتت نظري لزميل غالي عندي نجم، عامل فيديو ماسك فيه بعض المستندات وبيقول أنا المسلسل رقم واحد، طيب المسلسل رقم واحد محتاج بذل مجهود علشان الواحد يفهم إن ده رقم واحد أو اتنين أو ألف، رقم واحد ده محتوى بيلقى استحسان الجمهور وبيحصل تداول في الشارع، وتفتح الإنترنت تلاقيه وتقعد على قهوة تلاقي الناس بتتكلم عليه، إنه مسلسل بيعمل حالة رواج ويبقى رقم واحد أو من الأرقام الأولى، وفيه حاجة اسمها توثيق زي المنصات موجودة في البيوت الناس مشتركة فيها، بتلاقي فيها أفضل 10 مسلسلات لأن الناس بتتفرج عليها طبقًا لحسابات الكمبيوتر، ولكن فكرة صعبة جدًا إنك تقدر تقول مين اتفرج على إيه على التلفزيون، هتقدر تعرف منين الساعة 9 إن حد قاعد بيتفرج على إيه؟ بيحصل اجتهادات من شركات محترمة بتحاول توصل لحاجات، ولكن الدرجة بتاعة إن ده يكون مظبوط 100% بالمنطق كل واحد يقدر يفكر فيها.

وتابع محمد سامي: أنا النهاردة كنجم لما آجي أسيب المنصة اللي أنا رقم 7 فيها وأقول أنا رقم واحد في التليفزيون اللي مقدرش أثبته يبقى ده غلط، لأن لما كان جعفر العمدة رقم واحد على التليفزيون وفي الشارع كان رقم واحد على المنصات، لما أي مسلسل لزملائي اللي هما أحسن مني كمان يكون رقم واحد يبقى رقم واحد في كل حتة، فمينفعش أحاول أثبت للجمهور فكرة إن أنا مسلسلي رقم واحد في الشيء اللي مش باين بورقتين في إيدي، الناس كلها عندها ريموت تقدر تفتح المنصات وتشوف مين رقم واحد، فواضح للجمهور إن مينفعش مسلسل رقم 7 أو 10 على منصة يبقى رقم واحد في التلفزيون.

وأضاف سامي: لما أقول مسلسلي أعلى تقييم في آخر 10 سنين، الجمهور يضحك عليك على طول، زي ما نزل الزميل العزيز، عمرك ما كنت أعلى من مسلسل جعفر العمدة والأسطورة والبرنس، أنا مش بضلل الجمهور، في 100 ألف طائفة بيتفرجوا على التليفزيون مينفعش إني أغفلهم وأقول إن المسلسل تقييم في آخر 10 سنين، لو أنت نزلت سؤال دلوقتي إيه أكتر مسلسل عمل رواج في آخر 10 سنين هتلاقي مسلسل جعفر العمدة هو ظاهرة، مفيش مسلسل تاني وصل لحالة الرواج دي وده بشهادة زملائنا، زي ما بنقول إن برنامج رامز جلال ظاهرة ومفيش بيت مصري مش فاتحه.

واستكمل: مفيش حاجة اسمها مسلسلي الأعلى في آخر 10 سنين، الجمهور يعلم جيدًا ومش محتاج حد يقوله، إحنا لما بنقول للجمهور بنقول ده للتوثيق لأن بقى بسهولة أي حد نجح أو منجحش يقول أنا رقم واحد، تريند بـ 75 جنيه ويقول أنا رقم واحد، رقم واحد ليها دلالات مع الجمهور، كلمة رقم واحد دي بقت تعصب.

وكان الفنان عمرو سعد قد خرج بفيديو له عبر حسابه الرسمي بموقع إنستجرام يرد فيه بشكل غير مباشر على تصريحات المخرج محمد سامي المتعلقة بتصدر مسلسل "الست موناليزا"، بطولة مي عمر، نسب المشاهدة طوال عرضه.

وكشف خلال الفيديو عن تحقيق مسلسله "إفراج" أعلى نسب مشاهدة هذا العام، بل وأعلى نسب خلال السنوات العشر الأخيرة، وفقًا لما وصفه بإحصائيات الشركات المعتمدة.

وقال عمرو سعد في الفيديو: اليوم تقريبًا نحن في نصف شهر رمضان، جاءتني نسب المشاهدة من كل الشركات المعتمدة التي تقيس أكبر نجاح وأكبر نسب مشاهدة، المفاجأة الجميلة بالنسبة لي ليس فقط تحقيق أعلى نسب مشاهدة هذا العام بفارق ضخم، ولكن تحقيق أفضل نسب مشاهدة تقريبًا في الأعوام العشرة الماضية.

وأضاف: المسلسل كسر الرقم القياسي بتاع "ملوك الجدعنة"، اللي كان أعلى مسلسل حتى العام اللي إحنا فيه. وبما لا يدعو مجالا للشك مسلسل "إفراج" هو الأعلى على الإطلاق خلال تقريبًا 10 سنين فاتوا.

وأوضح سبب حديثه عن نسب المشاهدة قائلًا: مهتم أقول ده ليه؟ لسبب مهم جدًا، هو المجهود الضخم الذي بذلناه في العمل لتقديم دراما كلاسيك ترضي كل فئات الجمهور، ويلتف حولها الناس في البيوت والشوارع، ويقدم رسالة مهمة.

ووجّه الشكر لنجوم العمل وصنّاعه، قائلًا: النجاح بيكم وليكم، وفي النص التاني نتوقع نعلى أكتر، دعواتكم وكل سنة وأنتم طيبين.

كما كتب تعليقًا على الفيديو جاء فيه: أحلى ماتش تكريم.. أنا فخور إني قدرنا نحقق ده والحمد لله وشكرًا ليكم.. إفراج بيحقق نجاح كبير والأهم من النجاح هو التأثير والاحترام للعمل، ده إحساسنا بالمحبة والاهتمام بكل تفاصيله رغم كل الصخب والدوشة والتشويش لإن الصدق بيوصل برسالته الصافية الرايقة.