محمد سامي يشكو أحد شركات الاتصالات

كشف المخرج محمد سامي في منشور عبر صفحته بموقع فيسبوك، تفاصيل معاناته مع شركة فوافون لرغبته في شراء جهاز ما فاي لكنه فوجئ بتعطل الموضوع.

وكتب محمد سامي عبر حسابه بموقع فيسبوك:"مرة من سنتين كتبت بوست عن فوادفون مصر، والبوست كان سلبي ، والناس بصراحة محترمين جدا كلموني وحلولي مشكلتي وكان تعامل راقي جدا وكمان أدوني خطين بأرقام مميزة كنوع من الأخلاق والاحترام، و حقيفي ده اللي شجعني إني أكتب النهاردة بوست جديد، بس مش عايز المرة دي أرقام، أنا عايز حل ، وحل يكون منطقي، ومحتاج حد يسمعني، حد افضفضله لأني زعلان من فودافون أوي وكل ما العلاقة بينا تتصلح ترجع تبوظ تاني، غالبا لما بنفضل شوية كويسين بنتحسد".

وأضاف محمد سامي: “أنا كل اللي أنا عايزه إنترنت للعربية، إنترنت متنقل، قالولي اسمه ماى فاي، وأعجبت بالاسم جدا وبقيت عايزه أكتر، روحت فرع أركان عشان أجيب الماي فاي، وقفت علي الباب قدام مكنة الأرقام (اللي بايظة وبتعلق) ولكن في رجل أمن محترم حاول يساعدني، وللأمانة أنا استغربت لما لقيته دخل فجأة وأنا بحاول أخد رقم ومد إيده ومسح كل اللي أنا عملته وقاللي أصل المكنة بتعلق !!، فقام موظف محترم يساعدني، رغم التكشيرة الجميلة الهادية اللي كانت على وشه اللي تخليك تحب الحياة ولكن بصراحة لم يصدر منه أي تصرف إلا الاحترام والتكشيرة دي حاجة شخصية الله أعلم هو عنده إيه، إحنا كعملاء فودافون هدفنا الأول راحة الموظفين، ولما الموظف معرفش يشغل المكنة، اقترحت عليه اني في موظف مفيش قدامه عميل ممكن يساعدني، قاللي بتكشيرته الهاديه الحلوة لأ لازم رقم ، وهنا قامت موظفة محترمة وراقية جدا ، بغض النظر عن نفس التكشيرة وهنا قلت لأ ، ده أكيد نظام المكان كده، وبرضه مش مهم لأني هدفنا كعملاء لازم يكون اسعاد موظفين فودافون”.

وتابع: “وهنا الموظفة سألتني بكل رقي، عايز تعمل ايه (لما لقت المكنة مش شغالة ) قلتلها على الإنترنت، وهي اللي قالتلي بصراحة انه اسمه ماى فاي وكمان هي اللي خلتني احب الاسم لما عرفتني كلمة ماى فاي، ولكن بعد ما اتعلقت بالاسم، قالتلي انه مش متوفر في الفروع وبس اونلاين، أو ممكن اكلم خدمة العملاء وهما يوصلوه لحد البيت، فرحت جدا، وكلمت خدمة العملاء وأنا كلي شغف وفرحان إني هيكون عندي ماى فاي، وفوجئت بالموظف المحترم اللي رد عليا بيقوللي انه مش متوفر أونلاين وانه متوفر فبعض الفروع، وبغض النظر ان كلامه يتنافى مع كلام موظفة الفرع رغم إن الاتنين فودافون بس مش ده اللي شغلني أنا اللي شغلني يا ترى الموظف اللي معايا علي التليفون مكشر هو كمان ولا مخالف السيستم”.

وأنهى حديثه قائلا: “المهم قاللي أقرب فرع ليك فيه جهاز متوفر هو فرع في الهرم، وأنا ماليش أي علاقة بالهرم، ولما قلتله ان فودافون مسؤلين إنهم يوصلولي جهاز بأي طريقة، قاللي ان ده مش المفروض ولا حاجة وإني لازم اروح فرع الهرم، هنا أنا زعلت جدا لأني مش هقدر أروح فرع الهرم مخصوص لأني ساكن في أكتوبر للأسف، بس السؤال، ليه الجهاز مش متوفر اونلاين، وليه موظفة الفرع مش عارفة، وليه الجهاز في فرع الهرم بس، هل الناس في الهرم أطيب من الناس اللى في أكتوبر، وليه الناس مكشرة يوم واحد يناير، والسؤال المهم، ليه جهاز الأرقام بايظ، وأهم سؤال، ليه يا فودافون”.