محمود يعد يكشف سر علاج أنغام في ألمانيا

علق الإعلامي محمود سعد في بث مباشر له عبر حسابه بموقع التواصل الاجتماعي فيسبوك، على تطورات الحالة الصحية للمطربة أنغام.

وقال محمود سعد في فيديو لايف عبر صفحته بموقع فيسبوك: “ما تخدش خبر من أي مكان. معظمها فاكس. أنا في قصتي مع أنغام. باخد المعلومات من أنغام نفسها أو راندا مديرة أعمالها ولما بتكلمني بتكون أنغام جنبها، مش من الدكتور بتاع أنغام ولا التمرجي بتاع أنغام. لأن الأخبار دي مفيش مجال تكون تأليف. أفتح النت ألاقي أخبار كتير مغلوطة.. إزاي تقول أخبار وكأنها يقين. وأنها عملت 3 عمليات وجالها خراج وتعرضت لخطأ طبي وده كله ما حصلش".

وطالب محمود سعد بعدم نشر أخبار غير صحيحة عن أنغام، قائلًا: دي مشاعر ناس بتحب فنان بجد بتلعبوا بيها ليه؟ زي اللي يقول الحالة في منتهى الخطورة. ليه بتعملوا كده؟ وأنا بأكد لكم ان الخطورة والألم زال. وهي في حالة من الانسجام من حالة الحب".

كما رد محمود سعد على الأقاويل التي تنتقد سفر أنغام لتلقي العلاج بالخارج، حيث قال: “ أنغام تعبت ودخلت المستشفى وأنا مكنتش أعرف وعرفت بعد ما خرجت من مستشفى الصفا، ولما كلمتها وقالت لي طبيعة مرضها، قلت لها دوري على أحسن مستشفى للبنكرياس ولقيتها في ألمانيا. يعني متخصصة في كل حاجة تتعلق بالبنكرياس. وأنا لما عملت عملية لوز لبنتي من 36 سنة قلت لهم مش عاوز أعظم دكتور ولكن عاوز دكتور بيعمل كل يوم 20 عملية يعني عنده خبرة ومتدرب. فاحنا عاوزين مستشفى متدربة على كل حاجة في البنكرياس. وده لا يقلل من قيمة الطب المصري. محدش يقدر يشكك في قيمة الطبيب المصري. لكن إحنا في عندنا قنوات مسدودة وقنوات العلم مش سالكة والطبيب معذور. كم طبيب خرج بره وحقق نجاحات لما لقى المسار العلمي المفتوح. كام طبيب مصري ما نجحش قليل جدًا، لكن هل عندنا في الوطن العربي أطباء تخصصوا في البنكرياس وبيعملوا عمليات يوميًا. الإجابة لأ".

وأضاف: "في ناس في أوربا بتتعالج في أمريكا وده مش معناه ان الطب في إنجلترا مش حلو. وفي فرنسا متخصصين أكتر في السرطان. وأن يتقال أن الطب المصري مش تمام وإزاي هي سابته، كلام مش منطقي ومش صحيح. في حدود الإمكانيات المتاحة للطبيب وللبحث العلمي هو ممتاز. ولكن في حاجات متطورة وأجهوة حديثة”.