جنش: مفيش حراس كتير أحسن مني.. والشناوي حارس مصر الأول بسبب الأهلي

أزاح محمود جنش حارس مرمي الزمالك الأسبق، الستار عن حقيقة مفاوضات الأهلي لضمه، وكواليس اختيار الحراس لمنتخب مصر الأول.

وقال محمود جنش حارس الزمالك السابق في تصريحات إذاعية: مفيش حد بيلعب في الزمالك هيبقي مش جامد، ليه الزمالك هيجيبه من الأول لو مش جامد، ممكن مكنش موفق، إحنا لعبنا قدام صن داونز في النهائي وإحنا 15 لاعب في القائمة، وكنت بلعب في التقسيمة باك رايت.

وأضاف جنش: آخر سنة في الزمالك كان فيه مشاكل بين الثلاث حراس اللي كنت بينهم بسبب المشاركة، لدرجة مبنكلمش بعض ولكن قدام الشاشات بياخدوا بعض بالحضن، لما كابتن عبد الواحد السيد قعدلي دكة مزعلش، وأنا مكنش بيفرق معايا ألعب أو ملعبش، دي وجهة نظر المدرب.

وواصل جنش: في وقت مكنتش بلعب مع الزمالك وهجدد، وكلمني الحاج محمد عبد الوهاب عشان أروح الأهلي، والفلوس في الزمالك كانت قليلة، بس وافقت على نص الفلوس وجددت، لأني مكنتش هعرف أبقى مرتاح لو روحت الأهلي.

وزاد جنش: فيتوريا كان بيجي يسقفلنا ومخدش ولا لاعب من مودرن، مش منطقي نبقى بنلعب في إفريقيا وميبقاش فيه ولا لاعب في المنتخب، اللعب في مودرن أصعب من الزمالك بكتير، عمري ما حاولت ملعبش ماتشات قدام الزمالك، لما بلعب قصاد الزمالك ببقى نفسي أكسب وأكتر ماتش كنت فرحان إني كسبته الموسم اللي فات.

وأكمل جنش: الحراس مظلومين إعلاميا، ممكن كورة واحدة تضيع ماتش بالكامل، وبشوف مفيش كتير حراس أحسن مني، لو بلعب أهلي أو زمالك كنت هروح المنتخب زي الطلقة، هات حراس الأهلي والزمالك في مودرن مكاني ومش هيقدموا زي ما بقدم.

واستطرد جنش: محمد الشناوي حارس مصر الأول عشان بيلعب في الأهلي وبس، هات الشناوي وصبحي وعواد في مودرن وأنا في الزمالك، هبقى حارس منتخب مصر الأول، الأهلي والزمالك بيساعدوا حراس المرمي.

وتختتم جنش تصريحاته قائلًا: فريريرا أفضل مدرب تعاملت معاه لأنه غيرلي عقليتي، وطلعت يوسف فاجئني بشخصيته ومخدش حقه في مصر، وأتمنى أمسح هدف زيزو فيا من مسيرتي رغم علمي بطريقة تنفيذه.