أول تعليق من محمد رمضان على ما تعرض له نجله خلال الأيام الماضية

علق الفنان محمد رمضان على ما تعرض له نجله، علي، خلال الأيام الماضية بعد قرار إيداعه في درا رعاية.

وقال محمد رمضان، خلال حسابه الشخصي على "إنستجرام". : "القانون ده من 2018 ياسادة ضدر بضرورة حماية الطفل وينص على حجب هوية الطفل و اسمه و صورته عن الإعلام والصحافة، حتى لو كان مُجرد شاهد في قضية ولكن لأن الطفل ده أبوه محمد رمضان ( يبقى حلال ) .

وأضاف رمضان، " من حقي كأب اعرف مين خالف القانون وأصدر البيان الصحفي اللي مفيش مؤسسة واحدة قدرت ترفض نشره .. ورغم كل شيء لا أشك أبداً في نزاهة القضاء المصري .. ابني اللي كان واضح في الڤيديو اللي النيابة شافته أنه كان قاعد في حاله مع أخته الصغيرة في النادي وراحوله مجموعة أطفال.. يقولوله أنت أسود زي أبوك و أبوك عنده ڤيلا كبيرة وعربيات علشان فلوسه حرام، إنما احنا عايشين في شقق" نيو جيزة” علشان أهالينا مش حرامية .. ولما ابني كلمني في التليفون سمعت الكلام ده بنفسي .

وأضاف رمضان : " واضح أن ده كلام أهل طفل منهم لأن مستحيل طفل يفكر كده وده في حد ذاته بيزرع الحقد و الغل الطبقي بين الأطفال .. رحت لابني النادي واتكلمت مع الأطفال قدام فرد الأمن و مدرب السباحة انكم اخوات و جيران وده واضح في فيديوهات النادي اللي شافتها النيابة .. عموماً دي حلقة من سلسلة طويلة من الاضطهاد الواضح و القسوة والتعنت تجاهي لأكثر من 11 سنة."

وتابع رمضان قائلا : بكتب النهاردة بس علشان ماتخيلتش أنهم يدخلوا طفل عنده 11 سنة في معركتهم مع أبوه .. ماتوقعتش قسوة الحكم والتشهير بيا وبعيلتي للدرجة دي .. وللعلم الشارع المصري فاهم اللي بيحصل و شايفه بوضوح الشمس، مضيفا .. مهما حاولوا ومهما ظلموا سواء بالقصد أو بالجهل هنفضل أنا و أولادى وعيلتي نحب بلدنا وهنعيش ونموت فيها .. ولا عاش ولا كان اللي يكرهني فمصر .. نحيا كامصريين أولاً بحبنا لبعض بدون غيرة أو حقد أو استكتار علشان تحيا مصر.