سلمى غريب: يعني إيه يختاروا ممثلين على حسب عدد الفولورز؟.. وأكتر حاجة توجع أن المخرجين مش عارفين الجيل القديم

علقت الفنانة سلمى غريب، على ظاهرة دخول البلوجرز إلى المجال الفني، معربة عن استيائها الشديد بسبب عدم معرفة المخرجين الحاليين بالجيل القديم.

وقالت سلمى غريب، في لقائها مع الإعلامية إنجي هشام، في برنامج "المنسي" المذاع عبر شاشة قناة "هي": المخرجين كويسين وشاطرين، بس عندهم عيب أنهم مبيتفرجوش، المخرج لازم يتفرج علشان يعرف هيطوع الممثل إزاي، والمخرج ممكن يشوف فيا حاجة أنا معرفهاش، ومسلسل أحلام هند الخشاب كان نقله تانية خالص، وأنا مرضتش أقبل بأي عمل علشان التواجد بعد ما اتخرجت.

وأضافت: أستاذ أشرف زكي، عمل مؤتمر وأكتر حاجة وجعتني لما المخرج ومدير الإنتاج بيقولوا أنهم ميعرفوناش، أنا بكره السوشيال ميديا ونادرًا لما بطلع في برامج.

وتابعت: أنا اتعلمت في مشواري، أن الفنان عزيز وغالي أوي، لازم الناس تشوفه علشان عايزة يشوفه، لكن لو شافوه كل يوم هيبقى إنسان عادي زيه زي أي حد ماشي.

واستكملت: الفنانين اللي على التيك توك نصهم قاعد في البيت وميعرفوش شغلانة تانية غير الفن، وبيضطروا يعملوا ده وأنا مش ضدهم ولكن مش موافقة على ده مهما حصل، زنوا عليا كتير أصل الناس بتسأل عليكي، يا جماعة أنا مبحبش التليفون من الأساس.

واختتمت: الحاجة المخيفة أنه بيتقال أنهم بيختاروا على أساس عندهم عدد متابعن معين، أنا شايفة أن المخرج يجهد نفسه ويدور على الممثل الكويس ويروح يشوف عروض، ويشوف صاحب الشغلانة اللي بيحبها ويشوف هو قادر يعمل منه إيه، وهو يعني إيه يجيب حد عنده متابعين؟ في أغنية الأستاذ جمال عبد الحميد، عاملها عن الدراما من 60 سنة، وأغلب المسلسلات اللي كانت على الشاشة في الكليب الناس شافتها كتير جدًا ومكنش في سوشيال ميديا.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.