البلاك بلوك للنائب العام نزلنا نطالب بتطبيق شرع الله

أصدرت مجموعة البلاك بلوك بياناً صباح اليوم الخميس ، تنفى فيه إلقاء القبض على أي من أعضائها أمس أمام مكتب النائب العام المستشار طلعت عبدالله بعد إصداره أمراً بالقبض على كل اعضاء الحركة.

وتابع البيان : "نحن مجرد رد فعل لغياب القصاص..هل نكره أن يكون مرسي رئيسًا لكل المصريين يحكم بعقله وقلبه ويعدل بيننا.. بالطبع لا، لكن أنتم لا تثقون فى قوة الشعب، والآن أصبح للثوار درع وسيف، قريبًا سيصبح الثوار كلهم فى مواجهتكم في كل أنحاء الجمهورية، وستتمنون أن يعود اليوم الذي أعلنتم خلاله أنكم ميليشيات الدفاع عن مرسي والإخوان".

وأشار البيان :"نزلنا نطالب بتطبيق شرع الله.. وقولنا " القصاص القصاص.. قتلوا اخواتنا بالرصاص" .. مصداقاً لقول الله تعالى " ولكم فى القصاص حياة يا أولى الألباب " .. فرفض الإخوان والسلفيون.. ونزلنا نطالب بتطبيق شرع الله .. وقولنا " لا " لقرض صندوق النقد الدولى.. مصداقاً لقول الله تعالى " و أحل الله البيع وحرم الربا ".. فحلل الإخوان والسلفيون الربا وقالوا إن الفوائد ما هى إﻻ مصاريف إدارية..نزلنا نطالب بتطبيق شرع الله .. وقولنا " لا "للخروج الآمن للمجلس العسكرى اللى قتل وسحل ..مصداقاً لحديث رسول الله " إنما أهلك الذين قبلكم أنهم كانوا إذا سرق فيهم الشريف تركوه، وإذا سرق فيهم الضعيف أقاموا عليه الحد " .. فقام الإخوان والسلفيون بتكريم طنطاوى وعنان أفضل تكريم.. فعن أى شرع يتحدثون!"

وإستكمل :"الشريعة الإسلامية لا نرفضها بل نحن معها هي التي تعطي كمال للحياة فهي المنهج الأكثر نجاحًا، أما عن الفارق بيننا، فإنكم ترون أن الشريعة أتت لتقييد الحياة، ونحن نري أن الشريعة أتت لتجلب الحرية ولتنظم الحياة، إن الله فقط من يحاسب الإنسان، الله من خلقنا، وليس من يريد تطبيق الشريعة الوهابية " .

وأضاف بيان الحركة "مكملين ..مصر لكل شعب مصر بكل طوائفه ليست ملك لجماعة بعينها، إحنا شباب أحرار اقسم بالله العظيم إحنا شباب بنحب مصر، ومش مخربين ولا بنشيل سلاح ولا عمرنا هنشيل سلاح أبدا، لأننا بصراحة ضد الدم كرهنا الدم والحق هيرجع لأصحابه غصب عن أى حد مهما كان مين هو".

وإختتم بيان الحركة التى ظهرت منذ فترة قليلة :" مكملين لغاية آخر نفس فينا ومش هنزهق ولا هنمل أبدا نفسنا طويل أوى يا مرشد، احنا اللى قمنا بالثورة دى واحنا اللى تعبنا فيها واحنا اللى شلنا أخواتنا لما ماتوا على إدينا إحنا اللى اتخونا واتقال علينا بلطجية وعملاء وممولين أصحاب أجندات من الخارج، ..أحنا اللى نزلنا وقولنا يسقط حكم العسكر وطالبنا بمحاكمة المجلس العسكرى على المجازر اللى عملها من ساعة ما تولى الحكم ومرسى فى الآخر كرمهم على قتل اخوتنا، إحنا السبب اللى وصل مرسى للمكان اللى هو فيه دلوقتى، وإحنا السبب إنكم متبقوش جماعة محظورة وتطلعوا للنور، احنا اللى وافقين فى وش أى ظالم بيحاول ييجى على الغلابة، احنا شباب 25 يناير يا مرشد إحنا أصحاب الثورة مش انتم ،ومش هنسبكم تمشوا البلد على مزاجكم ..على جثتنا يامرشد "