حازم ويفى مؤلف أغنية أنتيكا: اتكتبت قبل تكوين الفرقة .. واستوحيت فكرتها من علاقة عاطفية سامة

كشف الشاعر الغنائي حازم ويفي، الكواليس وراء أغنية أنتيكا، غناء فرقة وسط البلد، ومطربها هاني عادل، مشيرًا إلى أن هناك قصة حقيقية خلف تلك الأغنية.

وكتب حازم ويفي منشورا عبر حسابه الرسمي بموقع إنستجرام، قائلًا: أغنية أنتيكا اتكتبت في وقت ما سنة 1999 قبل تكوين فرقة وسط البلد، وأول مرة تتغنّى سنة 2004.

وأضاف ويفي: الوحي الأساسي فيها هو قصة عاطفية لصديق وأخ كان في علاقة سامة جدًا مع بنت ما، كنا بايتين مع بعض يومها وكنت نايم وهو عمال يتكلم معاها ويتودود في التليفون، وكنت طول الوقت أقوله يابني دي مش بتحبك صدقني وأنا مش مرتاح لها، فصحيت بسببه متعصب وكتبت الكلمات دي: أكمنك صدقت عنيها وبقت روحك تجري عليها، قلبك بقى أنتيكا في بيتها.. وركنتها شوية.

وتابع حازم ويفي: لكن هو ماسمعش كلامي طبعا وكمل في العلاقة، مش قادر أحدد كملت كتابة الأغنية إمتى وإزاي، لكن كملتها وبعتها لـ هاني عادل اللي كان ساعتها شغال في فندق بيغني فيه في الأقصر، ولحنها فعلًا لكن ركنها فترة كبيرة، وحتى لما اتكونت الفرقة بعدها بسنة، خافوا جدًا يغنوها.

واختتم حازم ويفي: أولًا لأنها عن علاقة عاطفية، ومكنتش وسط البلد في الأول اشتغلت في الموضوعات دي، وثانيًا علشان البنات متبقاش زعلانة وغضبانة لما تسمعها، لغاية سنة 2004 وبعد إقناع مني ومن المخرج الصديق عمرو سلامة اللي أخرج الكليب.. وافقوا يقدموها.