حمو بيكا يرد على منتقدي سبوع ابنته : خفو شوية..في ناس بتتهادى بألماظ وعربيات

رد مطرب المهرجانات حمو بيكا علي منتقدي سبوع ابنته تاج في بث مباشر علي صفحته الشخصية بموقع فيسبوك .

ظهر حمو بيكا وزوجته خلال حفل السبوع الأسبوع الماضي بإحدي قاعات الأفراح الكبري مرتديان مشغولات ذهبية ضخمة ،حيث تعرض حمو بيكا وزوجته لهجوم وانتقادات من قبل متابعيه علي الفيس بوك .

وظهر خلال الساعات الماضية حمو بيكا عبر بث مباشر علي صفحته علي الفيسبوك ليرد علي منتقديه قائلًا : سيبوا الملك للمالك ، والكلمتين دول للقريب قبل الغريب ، أنا طالع من منطقة شعبية اسمها الدخيلة ، من أسرة مكونة من أربع أخوات وأب وأم ، وكنا قاعدين في أوضة وصالة وحمام داخل المطبخ ، وأول مرة أقول الكلام ده ، وأعذروني أن كنت قاعد في أوضة وصالة والحمام جوا المطبخ وابويا كان بيسافر علي باب الله علشان ناكل لقمة بالحلال .

وأضاف حمو بيكا خلال البث المباشر : أنا مدخلتش مدرسة وما اتعلمتش لكن أشتغلت وشقيت واتغربت كتير وأنا صغير ، وعمري ما مديت إيدي في حاجة مش بتاعتي وكنت بقول يارب أكرمني وأبقي حاجة لأهلي، ولما ربنا بيكرم بني آدم ويرزقه مش من فراغ ، وما اتولدتش في بقي معلقة دهب وكنت بحب الخير لكل الناس ولحد الوقت ده .

وكشف حمو بيكا عن صور له قبل الشهرة ، معلقا:صوري دي تاج علي راسي لحد وفاتي ، وكنت راجل شقيان وتعبان ، وبدأت رحلتي وقولت أجرب ، اشتغلت وغنيت وجت معايا والناس حبتني لأن دمي خفيف ، وأنتم اللي حكمتوا عليا أن دمي خفيف .

وتحدث حمو بيكا خلال البث المباشر عن زوجته قائلا : ربنا كرمني بشمس الإنسانة اللي بحبها ومتجوز من 3 سنين وداخل في السنة الرابعة ، وربنا رزقني بمولودة بعد 3 سنين من الجواز وسميتها تاج وقولت ندرا عليا لأعملها سبوع العالم كله يتكلم عنه .

وأضاف حمو بيكا : حوار الذهب اللي مراتي لبساه مش جديد ، وفيه واحدة معرفهاش اتكلمت وهسمعكوا كمية الحقد والغيرة والنفسنة ومش هي لوحدها اللي بتتكلم بصفار وغل ولو دي حفيدتها أو بنتها وهي قادرة هتعمل أكتر من اللي أنا عملته وأنا معرفهاش وشفت من ده كتير وشفت غل من ده كتير مش فاهم ليه وبتقول مراتي لابسة خمسة ستة كيلو دهب .

وعن سبوع ابنته تاج ، فعلق حمو بيكا قائلا : أنا فرحت ببنتي وعملت عقيقة وذبحت لها وعملت السنة اللي المفروض تتعمل ، وطلعت لحمة وأكلت وعلي طول مش في العقيقة بس ، لكن أنا كنت نادر أعمل لها الليلة دي ، لأني جاملت كتير وأخواتي اللي نوروني ونجوم مصر كلهم جم يجاملوا حمو بيكا وعملت لها الليلة واتقال لو أتجوزت هتعملها إيه ، هعملها ليلة ويارب أنتي تعيشي علشان تشوفيها .

واختتم حمو بيكا قائلا : عاوز أقول لكل واحد قريب ما تتصلش بيا تطلب مني شئ علشان أنت معاك الي يديلك وبتطلب ببجاحة، أنا مش هديك حاجة ، هي الحاجة غصب ما تطلبش ببجاحة وقلة أدب ، وخفوا شوية أنا عملت سبوع بنتي إيه المشكلة في ناس بتعمل وبتجيب وبتتهادي بهدايا عربيات وألماظ هي الكحكة في إيد اليتيم عجبة!؟