عشت 40 سنة دراما من الـ 60 سنة اللى بدأت فيها.. ”إلهام شاهين” من مهرجان القاهرة للدراما

أعربت الفنانة "إلهام شاهين" عن سعادتها الغامرة بإختيارها كعضو من أعضاء لجنة تحكيم مهرجان القاهرة للدراما في دورته الثانية.

وظهرت "إلهام" بفستان يعكس اناقتها من اللون البينك وعلقت قائلة: "الناس ديما كانت بتشوفني بفساتين من اللون الأسود فبيستغربوني أما بلبس ألوان.. وعشان كده اخترت فستان يناسب الأجواء اللى مليانه صيف وبحر".

وعن انعقاد المهرجان بمدينة العلمين علقت "إلهام" قائلة: "تحفه بجد بجد مدينة العلمين شئ رائع نفتخر بيه جدا كمصريين وهي أحدث مدينة في مصر معموله على احدث طراز".

وتابعت "إلهام" حديثها قائلة: "أجمل مصيف على البحر المتوسط في الساحل الشمالي.. الناس كلها متجهه ليه لأن بدأ يتعمله دعاية قوية".

اما عن اختيار "إلهام" كعضو لجنة تحكيم علقت قائلة : "طبعا مبسوطة جدا.. انا عملت 50 مسلسل في خلال 40 سنة فانا عشت 40 سنه دراما من 60 سنة بنحتفل فيها بسنني الدراما".

واستطردت "إلهام" في حديثها قائلة : "كل سنه ليه عمل وأحيانا اكثر من عمل.. حتى في مرحلة متقدمة بيكون ليه عملين في رمضان فأنا بحترم الدراما جدا وتأثيرها على المجتمع وكنت سعيدة إني أكون في لجنة التحكيم السنة دي مع قامات عظيمة زي كريم عبد العزيز وعبد الرحيم كمال والناقد طارق الشناوي.. اسماء مهمة واللجنة كانت صعبة وده لأن الأعمال اللى اتعرضت طول السنة كانت كتيرة".

وعن جوائز المهرجان قالت "إلهام" : "فيه كذا عمل يستحق لازم نختار عمل واحد او 2.. ومن كتر الجمال الناس كلها تستحق الجوائز.. الجمهور يقدر يتوقع الجوائز لكن ميقدرش يتوقع اعمال رمضان".

واختتمت "إلهام" حديثها قائلة: "الجوائز دي بتخلي كل الفنانين يهتموا طول السنة بأعمالهم لأن كل الأعمال دي بتشارك في المهرجان وممكن تاخد جوائز".