د.العكل لجريدة ”النهار””استغنى عن المرارة وعش طبيعي؟” جراح مناظير يجيب على أكبر 3 مخاوف
تعد عملية إزالة المرارة من أكثر العمليات الجراحية شيوعاً في العالم. فمع انتشار نمط الحياة السريع والأكل الدسم، أصبحت حصوات والتهابات المرارة سبباً متكرراً لدخول غرف العمليات، خاصة مع تطور جراحات المناظير التي حولت العملية من جراحة كبيرة إلى إجراء بسيط يستغرق أكثر ساعة ونصف.
لكن رغم بساطتها الطبية، تظل العملية مصدر قلق لكثير من المرضى. السؤال اللي بيتكرر دايماً: "هل جسمي هيقدر يستغنى عن المرارة؟ وهل الأكل بعدها هيبقى طبيعي؟ وإيه المخاطر اللي ممكن تحصل؟"
في هذا الحوار لجريدة "النهار" مع استشاري جراحات المناظير والجهاز الهضمي الدكتور محمد عاطف العكل الذي يتحدث عن الجوانب الطبية للعملية، والمخاوف اللي بتمنع ناس كتير من اتخاذ القرار. هنفهم:
- متى تصبح الإزالة ضرورة وليست اختيار؟
- ما هي المخاطر والمضاعفات المحتملة أثناء وبعد العملية؟
- وكيف يتأقلم الجسم مع الحياة بدون مرارة على المدى الطويل؟
يجيب الدكتور محمد العكل الأسئلة الشائعة عن استئصال المرارة بالمنظار..لعل من اهمها..
-هل المرارة عضو مهم جداً والجسم ماينفعش يعيش من غيره؟*
-- لا. المرارة مش عضو حيوي. وظيفتها تخزن العصارة الصفراوية فقط. الكبد هو اللي بينتجها، والجسم يقدر يكمل من غير المرارة عادي جداً.
-بعد ما أشيل المرارة بالمنظار، هحتاج أخد علاج تعويضي مدى الحياة؟
-- في الغالب لا. مش بتحتاج أي دواء تعويضي أو عصارة صفراوية صناعية. الكبد بيكمل يفرز العصارة مباشرة للأمعاء.
- طب ليه بعض الناس بيجيلهم إسهال بعد العملية؟
-- ده طبيعي في أول 4-6 أسابيع عند بعض الأشخاص. لأن العصارة بقت تنزل باستمرار بدل دفعات. غالباً بيروح لوحده. لو استمر بنقلل الدهون شوية أو بناخد ألياف/دواء بسيط لفترة مؤقتة.
-هل هيحصل نقص في الفيتامينات بعد استئصال المرارة؟
-- لا. امتصاص فيتامينات A, D, E, K اللي بتدوب في الدهون بيستمر طبيعي طالما الكبد والقنوات المرارية سليمة.
- هل لازم أمشي على نظام غذائي معين طول عمري؟
-- لا. بس أول شهرين الأفضل تبدأ بأكل خفيف وتدخل الدهون تدريجي عشان جسمك يتعود. بعد كده ترجع لأكلك الطبيعي.
- إمتى أقلق وأروح للدكتور بعد العملية؟
-- لو حصل: ألم شديد مستمر، اصفرار في العين أو الجلد، حرارة، أو إسهال شديد ومستمر أكتر من شهرين. ساعتها لازم مراجعة فورية.
-هل أقدر أرجع للشغل والرياضة بعد قد إيه؟
-- مع المنظار معظم الناس بترجع للشغل الخفيف خلال 3-7 أيام. الرياضة التقيلة بعد 3-4 أسابيع بعد استشارة الجراح.
واختتم الدكتور محمد عاطف استشاري جراحات المناظير، ان
استئصال المرارة بالمنظار بيحل المشكلة مش بيخلق مشكلة جديدة. جسمك بيتأقلم بسرعة وبتعيش حياتك طبيعي 100%.