والدة ميرنا هشام نجمة آراب أيدول تفتح النار على منتقديها

خرجت والدة الفنانة ميرنا هشام، نجمة آراب أيدول، لترد على بعض الشائعات المنتشرة على مواقع التواصل الاجتماعي حول أنباء انتحار ابنتها بسبب أزماتها النفسية الأخيرة، مؤكدة أنها بصحة جيدة.

وعلقت والدتها عبر حسابها الشخصي بموقع التواصل الاجتماعي بفيسبوك: والله يا جماعة ميرنا كويسة والحمد لله ولا يمكن تفكر مجرد التفكير في الانتحار، لأنها قريبة قوي من ربنا وقلبها أبيض، ولكن كل الناس الفترة الأخيرة بتمر بظروف والبيوت أسرار والموضوع أصلا ميستهلش كل ده، واللي بيشهر وبينقل كلام محصلش منه لله ربنا أقوى من الكل وحسبي الله ونعم الوكيل في كل ظالم.

أول تعليق من ميرنا هشام حول أزمتها الأخيرة

وكانت ردت ميرنا هشام بفيديو نفت به الأنباء المتداولة عن انتحارها، مؤكدة أنها بصحة جيدة، وأنها كانت تعاني فقط من التعب النفسي الذي أثر على صحتها الجسدية.

وأكدت ميرنا هشام خلال الفيديو: أنا عايزة أطمنكوا أنا كويسة، وإني منتحرتش وأي حد فعلا عارفني عمره في حياته ما هيتخيل إني أعمل حاجة زي كده، لكن كل الحكاية إني تعبانة شوية بس مش لدرجة إني انتحر خالص، أنا بقيت أحسن ولو أنا مختفية بقالي فترة، فأنا بس تعبانه نفسيًا، وتعبي النفسي أثر عليا جسديًا جدًا زي أي حد ممكن يحصله حاجة زي كده.

وأضافت ميرنا: بس ادعوا لي أني ابقى كويسة وأنا كويسة، كلنا بلا استثناء بنمر بفترة مش كويسة، بس بنعدي وعادي، وأنا مريت بالفترة دي وهعدي ومتعودة على كده، بس أنا معرفش الموضوع كبر كده ازاي، أنا آسفة لكل حد كلمني وأنا قافلة موبايلي، مش قادرة أرد على حد خالص فعلًا، ادعوا لي أبقى كويسة بس، وأوعدكم هبقى كويسة وأنا بخير ومفيش حاجة من الكلام ده خالص.