مصطفى هريدي يكشف مفاجآت خطيرة بشأن حادث الشيخ زايد: اتصالحت مع الأهالي

تحدث الفنان مصطفى هريدي، عن تفاصيل حادث الشيخ زايد الذي أصاب خلاله 4 أشخاص عن طريق الخطأ، بعدما صدمهم بسيارته، وانتهت المسألة في النهاية بالتصالح وانقضاء الدعوى الجنائية، وعدم تنفيذ الحكم عليه بالسجن لمدة سنة.

وقال «هريدي» في تصريحات تلفزيونية: "الحادثة ما أثبتتش إني مدمن وشارب، أنا نمت لأني كنت بسعى في شغل غير شغل الفن ومسافر في الغردقة بقى لي أسبوع، وأغلب وقتي بصحى بدري وبقابل ناس في النهار وبنام متأخر، وفي أسبوع عدى عليا إجهاد، واللي حصل قلة نوم ونمت على الدريسكون وبتحصل لأي حد وكتير اتعرضوا ليها، والناس بتبص لينا بصة مختلفة وبتصدق الوحش قبل الحلو والحاجات دي لم تثبت".

وأكد أن الحادث لم يتسبب في وفاة أحد وأن المصابين تم شفائهم، قائلًا: "الولاد كلهم خفوا وكل حاجة خلصت، ومافيش حد توفي والولاد ماكنوش يعرفوا إني ممثل وهما بسطاء وطيببن وشباب صغير ومن بيوت محترمة ومن إمبابة اللي فيها الأصالة وناس كويسين، واللي حصل أن السوشيال ميديا راحوا بيوتهم وسجلوا معاهم فيديوهات وكانوا بيتعاملوا مع الولاد وهما تحت تأثير العلاج، وخلوهم يتكلموا كلام مش حقيقي".

وأضاف الفنان مصطفى هريدي: "الناس مش عاوزين حاجة ولكن المحامين دخلوا في الموضوع وقالوا لهم إنه ممثل ومعاه ملايين، وهنأمن لكم مستقبلكم ولما روحت بيوتهم لقيتهم ناس بسطاء وقالوا مش عاوزين حاجة وهو قضاء وقدر وهما ناس في منتهى الاحترام واتصالحنا لأني عوضتهم عن تلفيات العربية".