منال في دعوي خلع.. مش بيهتم بنظافته الشخصية و ريحته وحشه بيستخسر يلبس هدومه الجديدة

أقامت منال بعد زواج 5 سنوات دعوي خلع ضد زوجها حملت رقم 1078 بمحكمة الأسرة بالحيزة، لعدم اهتمامه بنظافته الشخصية "ريحته وحشه و مش بيغير هدومه إلا كل أسبوع".

وقالت الزوجة في دعواها التي حملت رقم (1078) لسنة 2018، إنها تخاف ألا تقيم حدود الله، موضحة أن زوجها يعمل حدادا في إحدى الورش، وأنه لا يهتم بنظافته الشخصية نهائيا وتنبعث منه روائح كريهة وأنها سبق ولفتت انتباهه عدة مرات مطالبة منه الاستحمام وقص أظافره وحلاقة ذقنه وتجنب السجائر واستخدام فرشة الأسنان، وكان يستجيب في بداية الزواج إلا أنه بعد فترة يعود إلى الإهمال مرة أخرى.

وأضافت: "تعبت من كتر المحايلة بإنه يلبس كويس ويغسل أسنانه ويستحمى، لحد ما بنتي الصغيرة بدأت تلاحظ ده حتى لما ييجي يبوسها تقوله بابا ريحتك وحشة، الأول كان بيضايق وبعدين بدأ يزعق لها ويضربها لو قالت كدة.. ومش عايز يوديها الحضانة بيقولي علميها في البيت".

وتابعت: "أنا دايما نضيفة جدا في نفسي وبيتي والكل بيشهدلي بكدة.. الدنيا ضايقة علينا لوحدها مش هيبقى قرف من كل حاجة بناكل ونشرب عايشين بالعافية لكن النضافة دي مش عايزة فلوس.. أنا إنسانة عادية وبتعب في الشغل طول اليوم وبكمل في بيتي مع بنتي مش بيتعب لوحده بس زي ما أنا بروح أستحمى قبل ما أنام.. إحنا فقرا آه وعلى قد حالنا بس أبويا كان بيستحمى قبل ما ينام".

وتتابع: "تعبت وقرفت مفيش أي عناية بشكله حتى لما أشتري له هدوم جديدة يستخسر يلبسها يقولي مهي هتتبهدل.. من حقي جوزي يكون زي الناس.. عايزة أتكلم مع بني أدم مش قرفانة من ريحته.. لا مؤخذة لما بيدخل من برة البيت ريحته بتقلب أعصابي تعبت من التنضيف فيه وغسيل اللبس والشربات اللي ريحتها وحشة وبيرميها على السرير.. الموضوع وصل لأنه مد إيده عليّ لما قولتله متقربليش إلا لما تستحمى وتغسل سنانك.. أنا بنت ناس ومقبلش أعيش بالشكل ده"