ياسمين عز عن واقعة مطالبة شاب لخطيبته بتكلفة الهدايا بعد انفصالهما: الراجل بيفسخ ويصلي ركعتين شكر

علقت الإعلامية ياسمين عز، واقعة مطالبة شاب لخطيبته بتكلفة قائمة الهدايا والخروجات خلال فترة خطبتهما، بعد انفصالهما، عقب تداول قائمة الهدايا والخروجات وأسعارهما بين رواد التواصل الاجتماعي، ما أثار ضجة كبيرة.

وعلقت ياسمين عز خلال برنامجها على القصة، قائلة: "الناس بقى لها كام يوم بتتكلم عن ورقة، لا يعلمون مصدرها ومدى صحتها ولا حقيقتها، ولا هي مفبركة أو لا، ولا حاولوا يعرفوا ومعظم البنات بتكتب خطب عنها علشان الورقة دي على حد فهمهم بتقلل من الرجل وتقلل من كرمه وأخلاقه، وأنا باقول لك لا، لا الورقة ولا عشرة غيرها تقدر تنال من الرجل أو تقلل من احترامه".

وأضافت: "لو الورقة دي فيها حاجة ضد البنات كان اتعمل لها حذف وإلغاء من السوشيال ميديا، ولكن علشان راجل انتشرت، مبدأيا كده إيه اللي يثبت إن الورقة حقيقية، وهل في احتمالية يكون مصدرها واحدة ست عاوزة تشوه من سمعته".

وتابعت: "الفرعون منبع الكرم واللي بنى الهرم ومصدر العطاء والحنان، مستحيل يطلب من واحدة 20 جنيه في لعبة العربيات المتصادمة دي عمرها ما كانت أخلاق الفرعون، رابعًا نفترض إن الورقة حقيقية، طيب ما ممكن يكون الراجل من حقه يسترد الشبكة والهدايا اللي جابها، والمفروض البنت وأهلها من نفسهم يرجعوا الحاجات، لأنه جايب الهدايا دي للبنت اللي هيتجوزها، فهل اتجوزها لا، يبقى نرجع له حاجته، كنت باسمع من ناس في أهل التخصص إن الراجل في فترة الخطوبة يباخد شبكته والهدايا وبعد كتب الكتاب الموضوع بالنص وبعد الدخلة ما يخدش حاجة".

واستطردت ياسمين عز: "الراجل لما خطوبته تتفسخ مش بيدور على شبكة وهدايا لكن بيدور على سجادة صلاة يصلي عليها ركعتين شكر لإن ربنا خلصوا من الموضوع وخرج منها على سلام، فأرجوكم بلاش نشير حاجات مش متأكدين منها علشان نسوء صورة الناس على الباطل".

واختتمت حديثها في هذا الشأن قائلة: "بدال ما نفبرك في ورق وقصص وحكايات، خلونا نغير من ثقافة الناس، وخلونا نلغي موضوع الهدايا ده أساسا، خاصة إحنا بنعاني من أزمة اقتصادية، فبدال ما خطيبك يجيب لك بابا نويل في رأس السنة خليه يجيب لك مترين قماش قطيفة علشان الصالون، وبدال ما خطيب بنتك يجيب علبة كحك، قولي له ادفعهم في ديب فريزر، لأن العريس الغلبان فلوسه بتروح في خروجات وهدايا وبعدين تسألوا هو الخطوبة بتطول ليه، وفي الآخر تسيبوا الراجل".