خاص| خوفت من الفضيحة.. اعترافات طفلة متهمة بالتخلص من رضيعها بالجيزة

حصلت "النهار"، على نص التحقيقات مع "محمد.ص"، والطفلة "ش"، صاحبة الـ 16 عامًا، والمتهمين فيها بالشروع في قتل نجل الأخيرة بإخفاءه في كيس بلاستيكي وإلقاءه في القمامة بأحد الشوارع بأوسيم.

وننفرد بنشر نص التحقيقات مع الطفلة "ش"، المتهمة بالتخلص من رضيعها بعد ولادته بإلقاءه داخل القمامة، ليعثر عليه أحد المارة بعد سماع صوت بكاءه.

وإلى نص التحقيقات:

س/ ما تفصيلات اعترافك؟

ج/ اللي حصل إني عايشة مع أمي وجوزها اللي اتجوزته بعد ما أبويا مات، ومن حوالي سنة تقريبًا كنت بوديله أكل في المخزن اللي شغال فيه، لقيته اتحرش بيا وأجبرني أني أخلع ملابسي واعتدى عليا، والموضوع اتكرر مرتين بعدها لحد ما عرفت أني حامل وروحت لدكتورة عشان أتخلص من الطفل لقيتها رفضت فأنا داريت الموضوع ولبست واسع لحد ما جه يوم الولادة وقعدت أولد من يوم الخميس بليل لحد الجمعة الفجر.

س/ ما الذي حدث في أعقاب ذلك؟

ج/ أنا حطيت الطفل يومين في الشقة اللي فوق العمارة ومكنتش عارفة أعمل إيه، لحد ما قررت أتخلص منه وحطيته في شوال ورميته في الشارع جنب المصرف وبعدين عرفت إن جيراننا أخدوه وراح ملجأ.

س/ وهل حررتي ثمة محاضر ضد والد الطفل؟

ج/ لأ لأني كنت خايفة.

س/ ولما لم تخبري المتهم بحملك سفاحًا منه؟

ج/ أنا خوفت من إنكاره لنسب الطفل.

س/ وهل ساعدك أحد في وضع مولودك؟

ج/ لأ، أنا ولدت لوحدي، نزلت الصيدلية وقلتلهم إن أختي بتولد وعاوزين حاجة تساعدها وأدوني دوا وقعدت أولد من يوم الخميس بليل لحد الجمعة الفجر، وبعدها طلعت السطح في الشقة اللي فوق عشان محدش يسمعه.

س/ وما الذي حدث عقب ذلك؟

ج/ أنا أخدته حطيته في شوال ورميته على أول الشارع عند المصرف.

س/ ومن أين تولدت لديك تلك الفكرة؟

ج/ هي جاتلي من دماغي لما فكرت أنا هنزل بالطفل إزاي قدام الناس ومحدش يشوفه فجاتلي الفكرة لأني كل يوم برمي الزبالة في شوال جنب المصرف.

س/ وما الباعث لديك لذلك؟

ج/ أنا أعرف إن فيه ناس بتيجي كل يوم تلم الزبالة وأكيد فيه حد هيسمعه لما يعيط.

س/ وهل كنتي على علم بأنكي تعرضين حياة الطفل للخطر؟

ج/ أنا كنت خايفة من الفضيحة ومن أمي وجوز أمي، فقكرت أني أرميه وأي حد ياخده عشان متفضحش.