استغاثة سيدة أمام محكمة الأسرة: ”جوزي جابلي كونسيلر مغشوش دمر بشرتي”

ببشرة باهتة تشوبها الكثير من المشاكل، تقف سيدة ثلاثينية تروي لقاضي محكمة الأسرة بمدينة نصر معاناتها مع العقاقير والأدوية بعد تدمير بشرتها من مستحضرات التجميل المغشوشة التي طلبتها من زوجها وأحضرها لها ولكنها كانت مغشوشة وغير صالحة للاستخدام.

تتساقط دموع السيدة وهي تقول: "جوزي شوهني ودمر حياتي مش قادرة أخرج من البيت ولا أبص في وش حد، ثقتي في جوزي كانت كبيرة أوي، لكن هو طلع مش أهل للثقة كنت بطلب منه يشتريلي مستحضرات تجميل زي أي زوجة، وفعلا كانت بيشتري ليا اللي أطلبه والماركات اللي بقوله عليها، لكن بعد فترة بدأ يظهر مشاكل في بشرتي بشكل بشع وأنا مش عارفه السبب، كل مدى الموضوع بيزيد وصلت لمرحلة مش قادرة أخرج من باب الشقة بسبب بشاعة بشرتي ووصلت لمرحلة صعبة جدا وحالتي النفسية بدأت تسوء وكل ما أشوف شكلي في المراية أحزن على نفسي".

وتابعت الزوجة: "روحت لدكتور وبدأ يديني علاج غالي صرفت أكتر من 8 آلاف جنيه على بشرتي بدون نتيجة، مع الوقت وقفت مستحضرات تجميل وبشرتي بقت بتتحسن ولاحظت الفرق أوي، ولما قولت للدكتور طلب مني يشوف مستحضرات التجميل اللي بحطها، والصدمة إن الدكتور قالي أنها كلها مغشوشة وغير صالحة للاستخدام، من هنا فهمت كل حاجه كنت بطلب من جوزى فاونديشن وكونسيلر و لاحظت شكلهم الغريب لكن عمري ما شكيت فيه، مقتدر ماديًا ومفيش مبرر أنه يغشني ويشتري مستحضرات تدمر بشرتي بالشكل البشع دا".

وأردفت السيدة: "واجهته وقاللي إن المستحضرات مغشوشة وهو عارف ومخبي عليا بشرتي بتدمر وأنا حياتي واقفة و هو بيتفرج من بعيد مفكرش يقولي أو على الأقل يصلح الموضوع ويشتري الأصلية، بيفكر في الفلوس وبس مع إنه عنده فلوس قادر يشتري الأصلية ومش هتأثر عليه".

واختتمت السيدة حديثها: "عرفت أنه مش أمين ولا يمكن أثق فيه مرة تانية بعد اللي حصل لبشرتي والمشاكل اللي لسه بعالج فيها، لجأت للمحامية نهى الجندى وأقمت دعوى خلع والتي تحمل رقم 7894 بمحكمة الأسرة بمدينة نصر".